Türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň beýik işlerini üstünlikli dowam etdirýän hormatly Prezidentimiz Arkadagly Gahryman Serdarymyzyň ýadawsyz aladalary netijesinde Watanymyzda sport bilen meşgullanmak her bir raýat üçin elýeterlidir. Ýurdumyzda gurlup ulanylmaga berlen giň gerimli sport düzümi professional sport we köpçülikleýin bedenterbiýe bilen meşgullanmaga giň ýol açyp, jemgyýetimiziň sagdynlygynyň berk binýadyna öwrüldi.
Biz şu makalamyzda Diýarymyzda uly meşhurlyga eýe bolan sportuň ýüzmek görnüşiniň ynsan saglygyna peýdasy baradaky maglumatlary paýlaşmak isleýäris. Häzirki wagtda ýurdumyzda suw sport görnüşleri bilen meşgullanmak üçin iň döwrebap enjamlar bilen üpjün edilen köp sanly binalar we sport toplumlary bökdençsiz hereket edýär.
Ýüzmek — bu bogunlara agram salmazdan, tutuş bedeni toplumlaýyn sagaldýan köpugurly fiziki maşkdyr.
Saglyk üçin esasy peýdalary:
Daýanç-hereket ediş ulgamy we syrat (oňurga): Suwda bedeniň agramy takmynan 90% ýeňleýär, bu bolsa oňurga we bogunlardaky artykmaç agramy aýyrýar. Netijede, arkadaky agyrylary azaltmaga, syraty (oňurganyň durkuny) düzetmäge we myşsa gatlagyny berkitmäge ýardam edýär.
Ýürek-damar ulgamy: Yzygiderli türgenleşikler ýürek myşsalaryny berkidýär, gan basyşyny kadalaşdyrýar, damarlaryň çeýeligini artdyrýar we bedende gan aýlanyşygyny gowulandyrýar.
Dem alyş ulgamy: Sazlaşykly we yzygiderli dem alyş (çalt dem almak we uzak dem bermek) öýkeniň göwrümini giňeldýär, dem alyş myşsalaryny berkidýär hem-de ganyň kislorod bilen baýlaşmagyny üpjün edýär.
Myşsalar we agram: Ýüzýän wagtyňyz bedeniň myşsalarynyň 90%-e golaýy (gol, arka, egin, garyn we aýak) bir wagtda işjeň herekete gelýär. 30–45 minutlyk güýçli ýüzüş türgenleşiginde 300-den 500-den gowrak kilokaloriýa ýakylýar, bu bolsa bedeniň syratlylygyny saklamaga uly kömek berýär.
Nerw ulgamy we ruhy ýagdaý: Suw bedendäki fiziki we duýgy dartgynlylygyny aýyrýar, endorfinleriň («bagt gormonlarynyň») bölünip çykmagy bolsa ukyňy gowulandyrýar we dartgynlylyk (stress) bilen netijeli göreşmäge ýardam edýär.
Ýüzmegiň dürli usullarynyň aýratynlyklary:
Krol (erkin usul): Iň çalt ýüzüş usuly bolup, çydamlylygy artdyrmak, kaloriýa ýakmak hem-de egin we arka myşsalaryny kämilleşdirmek üçin örän amatlydyr.
Brass: Asuda we güýji tygşytlaýjy usul bolup, döş hem-de aýak (but) myşsalaryny berkitmek üçin örän peýdalydyr.
Batterflýaý (kebelek usuly): Iň köp güýç we energiýa talap edýän usul bolup, eginlere, gollara we beden sütüniniň (kor) myşsalaryna ýokary agram salýar.
Türgenleşik boýunça maslahatlar:
Täze başlaýanlar üçin: Hepdede 2–3 gezek, her türgenleşikde 15–20 minut.
Öňüni alyş we sagdyn syraty saklamak üçin: Yzygiderli 30–45 minutlyk türgenleşikler.
Ýüzmäge başlamazdan öň lukman bilen maslahatlaşmak maslahat berilýär, sebäbi ýüzmegiň hem käbir lukmançylyk çäklendirmeleri (meselem, deri ýa-da burun-bokurdak keselleriniň ýitileşmegi, bogunlaryň ýiti sowuklamasy ýa-da ýüregiň agyr keselleri) bolup biler.
Türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň we hormatly Prezidentimiz Arkadagly Gahryman Serdarymyzyň bimöçber aladalarynyň netijesinde bedenterbiýe we sport bilen meşgullanmak üçin döredilýän şert-mümkinçilikler ýurdumyzda professional sportuň ösüşine, sagdyn durmuş ýörelgesiniň berkarar edilmegine düýpli täsirini ýetirýär.
Pursatdan peýdalanyp, il-ýurt bähbitli beýik işleri durmuşa geçirýän, türkmen sportunyň ösüşiň täze belentliklerine alyp barýan Gahryman Arkadagymyza hem-de Arkadagly Gahryman Serdarymyza hoşallygymyzy beýan edýärin.
