Halkymyzyň gadymy taryhynyň güwäsi bolup lowurdaýan milli şaý-seplerimiz tutuş älemi haýran edýär. Asyrlara uzap gidýän geçmişe aralaşdygyňça, gözbaşyny gadymyýetden alyp gaýdýan özboluşly milli aýratynlyklarymyz ýüze çykýar. Ýyllardan-ýyllara, nesillerden-nesillere geçip gelen gadymy türkmen şaý-seplerimizde müň dürli öwüşgine eýe bolan tyllaýy nagyşlarymyz bar. Ata-babalarymyz gelin-gyzlarymyzy elmydama altyn-kümüşden ýasalan nepis şaý-sepler bilen bezäpdirler.
Gözellerimiziň görküne görk goşýan milli şaý-seplerimiziň nepisligi, çeperçilik derejesi baý many-mazmuna eýedir. Türkmen zenanlarynyň arasynda şaý-sep dakynmagyň ýazylmadyk kadasy bolupdyr. Iň owadan, açyk reňkli gaşlar goýlan şaý-sepleri ýaş gyzlar we gelinler dakynypdyrlar. Ýaşy durugşan zenanlar açarbag, tumar, bukaw ýaly şaýlary boýunlaryndan asypdyrlar. Bezeg şaýlary gelin-gyzlary gözden-dilden goramak üçin hem peýdalanylypdyr. Dagdany hem zenanlar ürç edip dakynypdyrlar. Dagdanlar ululy-kiçili, şelpeli we şelpesiz görnüşlerde bolupdyr. Zergärler şelpeli dagdanlara hakyk, pöwrize daşlaryndan gaş goýupdyrlar. Olary her hili haýwanlaryň ýönekeýleşdirilen şekilleri bilen bezäpdirler.
Bu gün birnäçe müňýyllyklardan aşyp, biziň günlerimize durkuny ýitirmän gelen, ussat zergärlerimiziň zehinlerinden, yhlaslaryndan dörän milli şaý-seplerimiz täze öwüşginde şöhle saçýar. Olara täze röwüş berilmegi halkymyzyň sungatda ýeten belent sepgitleriniň aýdyň subutnamasydyr.
