Paleogenetikler ilkinji gezek gadymy Hytaý Şimao siwilizasiýasynyň agzalarynyň genomlarynyň yzygiderliligini anykladylar. Şunda olaryň häzirki Şensi welaýatynyň paýtagty Şimao galasynyň gurulmagyndan azyndan müň ýyl öň ýaşandyklaryny subut edýän subutnamalar tapyldy.
«Biz Şimaodan we onuň töweregindäki 144 gadymy genomyň gurluşynyň yzygiderliligini we barlagyny geçirdik, bu ilatly ýeriň ýaşaýjylarynyň dört nesil şejerelerini açdyk. Bu maglumatlaryň seljermesi şol siwilizasiýanyň Hytaýyň degişli sebitinde azyndan müň ýyl ýaşan neolit döwrüniň Ýangşao medeniýetiniň wekillerinden dörändigini görkezýär» diýlip, gözlegiň wekilleriniň beýanynda aýdylýar.
Hytaýyň Ylymlar akademiýasynyň (Pekin) Oňurgaly haýwanlar paleoantropologiýasy we paleontologiýasy institutynyň professory Fu Çiaomeýiň ýolbaşçylygyndaky hytaý paleogenetikleri topary takmynan 4,3 müň ýyl mundan ozal Şensi welaýatynda bolan syrly Şimao siwilizasiýasynyň genetiki taryhyny giňişleýin öwrenmek üçin bu sebite geldi. Beýleki «Sary derýa siwilizasiýalary» bilen birlikde, ol Hytaýyň iň gadymy syýasy jemgyýetidigini öňe sürýär.
Onuň iň meşhur ýadygärligi gadymy Şimao şäheridir. Şunda ol dört inedördül kilometr meýdany tutýan, diwarlar bilen gurşalan we dürli wezipeleri hem sosial derejeleri bolan birnäçe böleklere bölünen uly ilatly ýer. Şimaonyň XX asyryň ahyrynda açylmagy uly gyzyklanma döretdi. Çünki onuň açylmagy Hytaýyň gündogaryndaky peslik sebitleriň — Merkezi düzlügiň Hytaý siwilizasiýasynyň ösüşinde esasy wezipäni eýeleýändigi baradaky meşhur teoriýany sorag astyna aldy.