Gülküli sahnalaryň ussady
Bu gün milli medeniýetimiziň, sungatymyzyň, edebiýatymyzyň ösmegine uly goşant goşan meşhur sungat ussatlarymyzyň sarpasy belent tutulýar. Milli medeniýetimiziň uly rowaçlyklara beslenýän döwründe sungat äleminde ebedi yz goýan halypa artistleri, režissýorlary ýatlamak sogap işdir. Şu babatda gürrüň edilende, beýleki sungat ussat işgärlerimiz bilen bir hatarda, gülküli sahnalaryň ussady Türkmenistanyň Magtymguly adyndaky döwlet baýragynyň eýesi, guýmagursak zehin Akmyrat Bäşimowyň döreden keşpleri bada-bat hakydamyzda janlanýar. Ol orta mekdebi tamamlap, 1955-1957-nji ýyllarda Marynyň lukmançylyk okuwynda okaýar. Soňra 1957-1961-nji ýyllar aralygynda Baku şäherinde jemgyýetçilik arassaçylygyny hem-de saglygyny goramak çäreleri boýunça ýokary okuw mekdepde bilim alýar. Okuwyny tamamlap, Aşgabat şäherinde lukmançylyk ugrundan işläp başlandygyna garamazdan, ýüreginiň bir künjünde sungata, onda-da kino sungatyna bolan söýgi gizlenip ýatyrdy. «Bendäm bendäme sebäp» diýlişi ýaly, Akmyrat Bäşimowyň kino sungatyna aralaşmagyna geçen asyryň 60-njy ýyllarynda telewideniýäniň edebi-drama bölüminde režissýor bolup işlän, «Kötek we degişme», «Ýartygulak» ýaly telewizion žurnallary taýýarlan, belli oýunlaryň birnäçesini goýan Türkmenistanyň halk artisti Baba Annanow, Orazdurdy Hojaýew, Öwlüýaguly Kulyýew, Bäşim Gurbanow, Aýnabat Amanlyýewa, Hommat Kakajanow, Allaberdi Meläýew, Gurbannazar Atakgaýew dagy sebäp bolýarlar.
«Aý dogsa, älem görer» diýlişi ýaly, Akmyrat Bäşimowyň ýiti zehini, wäşiligi, daşky sypaty, mydama hereketde bolan kiçijikden janly hem-de birneme mekirräk gözleri kinorežissýorlarda uly gyzyklanma döredýär. Ol şol wagtky «Türkmenfilmde» ululy-kiçili kinokeşpleriň birnäçesini ussatlarça janlandyrýar.
Akmyrat Bäşimow hakynda söz açylanda, «Ol ynsan kalbynyň lukmany» diýer ekenler. Bu onuň asyl käriniň lukman bolandygyndan däl-de, 30-a golaý filmde gülküli keşpleri döredip, tomaşaçylara şatlyk paýlap, ömürlere ömür goşandygy üçin bolsa gerek.
Onuň üçin kinokeşpleriň uly ýa-da kiçidiginiň parhy ýokdy. Zehinli artist «Kiçi keşp ýok, kiçi iş bar» diýer eken. Komediýa aktýory Akmyrat Bäşimowyň ady goňşy ýurtlaryň kinematografiýaçylarynyň arasynda-da bellidi. «Ak roýal», «Pagta hakynda poema» ýaly filmlerde onuň döreden açyk göwünli gahrymanlary tomaşaçylaryň göwünlerinden turdy. Ussat aktýor daşary ýurt filmlerini türkmen diline geçirmekde-de önjeýli işledi, 80-e golaý film zehinli artistiň gatnaşmagynda türkmen diline geçirildi.
Tebigy zehini bilen tapawutlanýan aktýor birgiden nusgawy keşpleri döredip, tomaşaçylaryň söýgüli kino ýyldyzyna öwrüldi, ol milli kino sungatymyza uly goşant goşan halypalaryň biridir. Onuň döreden köp sanly keşplerini sungaty söýüjiler belent hormat bilen ýatlaýarlar.
