Hytaýda geçirilen gumanoid robotlaryň ýaryşynda adaty bolmadyk netije görkezildi. Ýaryşlaryň öňüsyrasyndaky taýýarlyk synagynda «Lightning» atly gumanoid robot 100 metr aralygy 9,32 sekuntda geçdi. Bu görkeziji meşhur ýeňil atletikaçy Usain Boltyň 9,58 sekuntlyk dünýä rekordyndan hem çaltdyr.
«Lightning» robotyny Hytaýyň «Honor» kompaniýasy işläp düzdi. Synag wagtynda robotyň iň ýokary tizligi sekuntda 14,5 metre ýetdi. Bu görkeziji 22-nji awgustda Pekinde başlan ikinji Bütindünýä Gumanoid robotlar oýunlarynyň öňüsyrasyndaky taýýarlyk synagynda görkezildi.
Ýöne esasy netije resmi ýaryşda görkezildi. 22-nji awgustda geçirilen 100 metrlik ýaryşda «Tiangong Ultra» atly başga bir hytaý roboty 9,39 sekunt netije bilen birinji ýeri eýeledi. «Lightning» bolsa bu ýaryşda 9,47 sekunt bilen ikinji orna eýe boldy. Şeýlelikde, iki robot hem Boltyň 9,58 sekuntlyk rekordyndan çalt ylgady.
Şeýle-de bolsa, robotlaryň hereketlerini dolandyrmakda heniz kämilleşmegi talap edýän meseleler bar. Mysal üçin, käbir robotlar pellehana ýeteninden soň, tizligini saklap bilmän, gorag päsgelçilikleri bilen çaknyşdylar.
Şeýlelikde, adam bilen robotyň arasyndaky bäsleşik indi diňe filmlerde däl. Belki, geljekde sport meýdançalarynda robotlaryň öz rekordlaryny hem göreris.
Show more