Taryhy kitaplarda şeýle hakykat öwran-öwran teswirlenýär. Bir mejlisde gürrüňden gürrüň çykyp, Ymam Şapygy hakda söz açylypdyr. Şonda alymlaryň biri Ymam Şapygynyň ýatkeşligine haýran galypdyr. Sebäbi Ymam Şapygy üç müň jilt kitaby ýatdan bilýän eken.
Adamlar Ymam Şapygy hakda eşiden gürrüňlerini ýatlap, ony öwüp, taryplamaga başlapdyrlar. Şol wagt burçda oturan ýönekeý geýimli biri: «Ol meniň ýadymdaky kitaplaryň diňe zekat bölegini bilýän eken» diýipdir.
Mejlisde oturan adamlar muňa haýran galypdyrlar. Hiç kim bu ýigidiň sözüni inkär edip bilmändir. Ol Ahmet as-Sarahsy eken. Şol wagt ol on dört müň jilt eseri ýatdan bilipdir.