Türkmenistanyň Garaşsyzlygynyň 34 ýyllygy mynasybetli 2009-2010-njy ýyllarda doglan ýetginjekleriň arasynda futbol boýunça Türkmenistanyň birinjiligi geçiriler. 15—22-nji sentýabr aralygynda Aşgabat şäherinde geçiriljek ýaryşy Türkmenistanyň Bedenterbiýe we sport baradaky döwlet komiteti hem-de Türkmenistanyň Futbol federasiýasy bilelikde guraýar.
Türkmenistanyň birinjiligine 2009-2010-nji ýyllarda doglan ýetginjeklerden düzülen 10 topar — Mary, Lebap, Daşoguz, Ahal, Balkan welaýatlarynyň ýeňijileri, Aşgabat şäheriniň bedenterbiýe we sport baradaky Baş müdürliginiň «Çandybil», «Batly» toparlary, geljekgi olimpiýaçylaryň ýöriteleşdirilen çagalar-ýetginjekler sport mekdebiniň topary (GOÝÇÝSM), «Altyn täç» hem-de «Kuwwatly beden» çagalar futbol klublary gatnaşarlar.
Ýaryşyň ähli duşuşyklary «Aşgabat» köpugurly stadionynda geçiriler.
14-nji sentýabrda Türkmenistanyň Futbol federasiýasynda çekilen bijelere laýyklykda, toparlar aşakdaky tertipde 2 toparça bölündiler:
«A» toparça
«Daşoguz»
«GOÝÇÝSM»
«Ahal»
«Lebap»
«Çandybil»
«B» toparça
«Batly»
«Kuwwatly beden»
«Mary»
«Balkan»
«Altyn täç»
Ýaryşyň geçiş tertibi hakynda:
Ýaryş Futbol Assosiasiýalarynyň Halkara Federasiýasynyň (FIFA) düzgünleri boýunça geçirilýär.
Toparlar iki («A» we «B») toparça bölünip bir aýlawda biri-biri bilen bir gezek duşuşýarlar. Birinjiligiň ýarym finalynda A1 – B2, B1 – A2 toparlary duşuşýarlar. Ýarym finaldaky ýeňijiler jemleýji duşuşykda (final), ýeňlen toparlar 3-nji orun üçin duşuşýarlar. Oýnuň umumy dowamlylygy 70 minut (2 ýarym, hersi 35 minut), her ýarymyň arasynda 15 minut arakesme berilýär. Oýnuň dowamynda 7 (ýedi) oýunçyny üç gezekde çalyşmaga rugsat berilýär, öň meýdandan çykan oýunçy gaýdyp meýdana girmeýär.
Birinjiligiň ýarym finalynda we jemleýji duşuşyklarynda oýunlar deň hasap bilen tamamlanan ýagdaýynda goşmaça wagt berilmezden 11 metrlik urgular arkaly ýeňiji kesgitlener.