Ýurdumyza wekilçilik edýän «Ahal» futbol kluby Aziýanyň ikinji derejeli Çempionlar ligasynyň toparçalaýyn tapgyryndaky ilkinji duşuşygyny geçirmek üçin Hindistanyň Kalkutta şäherine bardy. «Ahal» futbol kluby toparçadaky ilkinji 3 utugyny almak üçin şu günden türgenleşiklere başlady.
Häzirki wagtda «Ahal» futbol klubuna PRO derejeli tälimçi Eziz Annamuhammedow baş tälimçilik edýär. Ol myhmançylykda geçiriljek bu duşuşyk üçin 23 futbolçyny toparyň esasy düzümine çagyrdy.
Derwezeçiler: Kakageldi Berdiýew, Gurbanmyrat Garaýew, Wepa Mammaýew.
Goragçylar: Bagtyýar Gürgenow, Azat Rahmanow, Beglimuhammet Bekmyradow, Oraz Ataýew, Oraz Orazow, Hakmuhammet Bäşimow.
Ýarym goragçylar: Alibek Abdyrahmanow, Gurban Annaýew, Bäşim Gurbanberdiýew, Ýakupmuhammet Gowşudow, Nurtagan Saryýew, Begenç Mämiýew, Salim Umarow, Döwran Hojamämmedow, Nazar Towakelow.
Hüjümçiler: Elman Tagaýew, Akmämmet Metdäýew, Enwer Annaýew, Süleýman Mirzoýew.
«Ahal» futbol kluby bu şäherde Hindistanyň «Mohun Bagan» toparynyň garşysyna çykar. Duşuşyk 16-njy sentýabrda «Wiwekananda Ýuba Bharati Krirangan» stadionynda geçer. Oýun sagat 19:15-de başlanar.
Ozal hem habar berşimiz ýaly, Aziýanyň ikinji derejeli çempionlar ligasynda ýurdumyza wekilçilik edýän «Ahal» futbol kluby toparçalaýyn tapgyrdaky duşuşyklarynyň Watanymyzda geçirilmeli ähli duşuşyklaryny Arkadag şäherindäki «Arkadag» stadionynda kabul eder.