7-nji oktýabrda «Awaza» milli syýahatçylyk zolagynda ýerleşýän Kongresler merkeziniň uly mejlisler zalynda «Ählumumy saglygy goraýyş hyzmatlary we durnukly ösüş maksatlary» atly ikinji halkara maslahat geçirildi. Bütindünýä Saglygy Goraýyş Guramasy bilen bilelikde guralyp, dünýäniň öňdebaryjy lukmançylyk bilermenlerini, saglygy goraýyş ulgamynyň ýolbaşçylaryny we halkara guramalaryň wekillerini bir ýere jemlän bu çäre ählumumy saglyk we durnukly geljek ugrunda möhüm ädim boldy.
Forumyň açylyş dabarasynda we esasy mejlislerinde saglygy goraýyş hyzmatlarynyň elýeterliligini ýokarlandyrmak, keselleriň öňüni almagyň döwrebap usullaryny ornaşdyrmak hem-de durnukly ösüş maksatlaryna ýetmekde sagdyn durmuş ýörelgeleriniň tutýan orny barada täsirli çykyşlar diňlenildi. Halkara tejribeleriň we innowasion tehnologiýalaryň milli saglygy goraýyş ulgamlaryna utgaşdyrylmagy, şeýle hem lukmançylyk ylmynyň soňky gazananlary maslahatyň esasy mowzuklarynyň birine öwrüldi.
Halkara maslahatyň işi günüň ikinji ýarymynda dürli seksiýalarda dowam edip, onda gatnaşyjylar sanly lukmançylygy ösdürmek, saglygy goraýşyň maddy-tehniki binýadyny berkitmek we sebitara hyzmatdaşlyk boýunça täze başlangyçlary hem-de geljegi uly teklipleri ara alyp maslahatlaşdylar.
