10 gol geçirilen täsin oýunda Angliýa Fransiýany utmagy başardy we 2026-njy ýylyň dünýä çempionatynyň bürünç medalyny gazandy. Bu iňlisleriň 1966-njy ýyldaky baş futbol ýaryşynda gazanan ýeňşinden bäri dünýä çempionatynda alan ilkinji medallarydyr.
Tomas Tuheliň topary oýnuň ykbalyny eýýäm birinji ýarymda çözdi we garşydaşyň derwezesine jogapsyz dört gol geçirdi. Gollary Deklan Raýs, Ezri Konsa hem-de dubl eden Bukaýo Saka öz atlaryna ýazdyrdylar. Arakesmeden soň Fransiýa oýna dolandy: Kilian Mbappe iki gezek, Bredli Barkolýa bolsa bir gezek tapawutlandy. Şeýlelikde, aratapawut azaldy. Angliýanyň peýdasynadygyna garamazdan, hasabyň 4:3 bolmagy dartgynlylygy artdyrýardy.
Şondan soň Saka 11 metrlik jerime urgusyny dürs ýerine ýetirip, het-trik etmegiň hötdesinden geldi. Fransuzlar muňa Usman Dembeläniň goly bilen jogap berdiler, ýöne oýunda soňky sözi Angliýanyň ýygyndysy aýtdy. Jud Bellingem hasaby 6:4-e ýetirip, duşuşygyň nokadyny goýdy.
Utulmagyna garamazdan, Fransiýanyň oýunçylary birnäçe rekord goýmagy başardylar. Mbappeniň DÇ-2026-nyň çägindäki sekiz oýunda 10 gol geçirendigini bellemek gerek. Ol ýaryşyň «Iň köp gol geçiren oýunçysy» adyna diýseň ýakyn. Şeýlelikde, Mbappe bu ugurda Messiden iki gol öňde barýar.
Umuman, Kilian Mbappe dünýä çempionatlaryndaky 21-nji we 22-nji gollaryny geçirip, ýaryşyň bütin taryhyndaky iň köp gol geçiren oýunçy boldy. Ol häzirlikçe 21 goly bolan Lionel Messini hem yzda galdyrdy.
Şu gün, 19-njy iýulda 2026-njy ýylyň dünýä çempionatynyň final duşuşygy geçiriler. Dörtýyllygyň futbol baýramynyň jemleýji oýnunda Ispaniýanyň we Argentinanyň milli ýygyndylary duşuşarlar.
