«Apple» kompaniýasy täze flaqman modeli — «iPhone 17 Pro Max» smartfonynyň resmi çykarylýan senelerini aýan etdi. Ençeme ýyllardan bäri däp bolşy ýaly, smartfonyň tanyşdyrylyşy 2025-nji ýylyň 8-nji sentýabrynda geçiriljekdir. Öňünden sargytlar 12-nji sentýabrdan başlansa, resmi satuwlar 19-njy sentýabrda badalga alar.
Tanyşdyryşyň geçiljek ýeri we wagty
«Apple» kompaniýasynyň maglumatlaryna görä, täze smartfonyň tanyşdyrylyş dabarasy Kaliforniýanyň Kuppertino şäherindäki «Apple Park» merkezinde geçiriler. Bu çäre kompaniýanyň resmi saýtynda we «Apple TV» mobil goşundysy arkaly göni ýaýlymda berler. Tanyşdyryş Aşgabat wagty bilen 22:00-da başlar.
Täze aýratynlyklar
Öndürijiniň habaryna görä, «iPhone 17 Pro Max» täze «A19 Pro» prosessory bilen enjamlaşdyrylar. Bu prosessor öňki nesle garanyňda, 20% has ýokary öndürijilik we 30% has köp energiýa tygşytlylygyny üpjün eder. Telefonyň kamerasyna täze 48-megapiksel sensor giriziler, şeýle hem suratlar düşürilende kämilleşdirilen stabilizasiýa ulgamy ornaşdyrylar.
Batareýanyň kuwwaty öňki modelinden 10% köpeldildi, bu bolsa programma üpjünçiligindäki optimizasiýa bilen bilelikde, 29 sagada çenli öçmän wideo görmäge mümkinçilik berer.
Asylly däp dowam edýär
«Apple» kompaniýasy birnäçe ýyl bäri dowam edýän däbine laýyklykda, täze «iPhone» modellerini her ýylyň şol bir senelerinde hödürlemegini dowam etdirýär. Mundan öňki modellerde bolşy ýaly, şu ýyl hem öňünden sargyt eden ulanyjylar satuwlaryň resmi taýdan başlanýan güni täze smartfonlaryny ellerine alarlar.
