Aşgabat şäheriniň häkimligi AFK-nyň Çempionlar ligasy – 2 bäsleşiginiň 1/8 finalynyň Türkmenistanyň «Arkadag» hem-de Saud Arabystanynyň «Al-Nassr» toparlarynyň arasynda türkmen paýtagtynda geçiriljek birinji duşuşygyna petekleriň onlaýn satuwyny işe girizdi. Duşuşyk 11-nji fewralda Aşgabat şäheriniň Olimpiýa stadionynda geçýär. Oýun 18:45-de başlanýar.
Petekleri satyn almak üçin Aşgabat şäheriniň häkimliginiň resmi saýtyndan (www.ashgabat.gov.tm) hem-de «Sanly şäher» mobil goşundysyndan peýdalanyp bilersiňiz. Petekleriň bahasy — 200 manatdan 400 manada çenli. Bahalar siziň saýlan ornuňyza baglydyr.
Ýeri gelende bellesek, her bir petek özboluşly QR-kody bilen tapawutlanyp, ol stadiona giriş wagtynda alyjynyň şahsyýetini tassyklaýar. Janköýerler ýany bilen pasportyny ýa-da dogluş hakyndaky şahadatnamasyny getirmelidir. Munuň özi peteklerdäki maglumatlaryň size degişlidigini tassyklamak üçin möhümdir.
Şunuň bilen baglylykda, guramaçylar resmi bolmadyk satyjylardan petekleri satyn almagyň gadagandygyny ýatladýar.
