Türkmenistanyň Döwlet gümrük gullugy serhetýaka gümrük nokatlarynyň ulag geçirijilik kuwwatyny ýokarlandyrmak we gümrük hyzmatlarynyň hilini kämilleşdirmek boýunça tapgyrlaýyn esasda netijeli işleri amala aşyrýar. Bu işleriň nobatdaky tapgyrynda türkmen-eýran serhedinde ýerleşýän «Artyk» hem-de «Sarahs awtoýollary» gümrük nokatlarynyň durkuny täzelemek boýunça gurluşyk işleri başlandy. Bu barada Türkmenistanyň Döwlet gümrük gullugynyň resmi saýtynda habar berildi.
Gurluşyk işleri «Ojar Aziýa» hususy kärhanasy tarapyndan 2025-2026-nji ýyllar aralygynda ýerine ýetiriler. Gurluşyk işleriniň barşynda gümrük nokadynyň çäginde öňki hereket edýän binalaryň durkuny düýpli täzelemek bilen bir hatarda, esasan, sanly ulgamyň mümkinçiliklerini giňden ornaşdyrmak hem-de gümrük amallaryny awtomatlaşdyrmak göz öňünde tutulýar.
Bu işleriň netijesinde halkara ýük daşamalaryny amala aşyrýan awtoulag serişdeleriniň gümrük nokatlaryň çäklerinde gümrük gözegçiligi üçin sarp edilýän wagty has-da azalmagy, üstaşyr geçirilýän ýükleriň bolsa artmagy üçin şertler dörediler. Şeýlelikde, gümrük nokatlaryň ulag geçirijilik kuwwaty has-da ýokarylandyrylar.
Türkmen-eýran serhedinde ýerleşýän «Artyk» hem-de «Sarahs awtoýollary» gümrük nokatlary ýurdumyzyň daşary söwdasy üçin haryt dolanyşygynda hem-de üstaşyr ýükleriň geçirilmeginde ähmiýeti uly gümrük nokatlary bolup durýar.
