Paýtagtymyzdaky «Köpetdag» stadionynda «C» derejeli tälimçileri taýýarlaýan okuw sapaklary badalga aldy.
Türkmenistanyň Futbol federasiýasy tarapyndan 6 – 12 ýaşly çagalary türgenleşdirmäge ygtyýar berýän «C» derejesini gazanmak ugrundaky dalaşgär tälimçileriň okuw sapaklary 2 tapgyrdan ybarat bolar. Her biri 5 gün dowam edýän okuwyň 2-nji tapgyry 26-njy awgustda başlanar. Türkmenistandan 4 instruktoryň sapak berýän bu okuwy 30-njy awgustda tälimçileriň synagy bilen tamamlanar. Synaglardan üstünlikli geçen tälimçilere çagalary türgenleşdirmäge hukuk berýän ygtyýarnama gowşurylar.
Ýokary derejede dowam edýän bu okuw sapaklaryna FIFA-nyň tehniki ekspertleri Swetlana Kaşuba hem-de Röwşen Meredow gözegçilik edýär.
Bu okuwyň çäginde «C» derejeli tälimçileri taýýarlaýan instruktorlaryň hem dördüsi bolup, olar okuwyň ahyrynda FIFA-nyň tehniki ekspertleri tarapyndan bahalandyrylar. Ýokary baha mynasyp görlen instruktorlar 2025-nji ýylyň sentýabrynda Özbegistanyň Daşkent şäherinde geçiriljek FIFA-nyň instruktorlarynyň synagyna gatnaşmaga mümkinçilik alarlar.
