1-2-nji oktýabrda Aşgabat «Turkmenistan Investment Forum» (TIF 2026) atly giň gerimli halkara işewürlik dialogynyň merkezine öwrüler. Bu çäre dünýäniň 45 döwletinden 800-den gowrak wekili, şol sanda öňdebaryjy halkara maliýe institutlarynyň hem-de transmilli kompaniýalaryň wekillerini bir ýere jemlär.
ABŞ-nyň, Beýik Britaniýanyň, Germaniýanyň, Fransiýanyň, Ýaponiýanyň, Singapuryň, BAE-niň, Saud Arabystanynyň we Merkezi Aziýa ýurtlarynyň döwlet hem-de işewür toparlary foruma gatnaşjakdyklaryny häzirki günlerden tassykladylar.
«Najd Gate Holding» maýa goýum holdingine ýolbaşçylyk edýän Onuň Alyjenaby Şazada Mansur bin Muhammed Al Saud hem-de Merkezi Aziýa sebiti boýunça Saud işewürlik geňeşiniň başlygy Ahmed bin Ali Al-Dahil tarapyndan ýolbaşçylyk edilýän Saud Arabystanynyň ýokary derejeli wekiliýetiniň sapary esasy wakalaryň biri bolar. Bu wekiliýetiň düzümine patyşalygyň energetika, senagat, oba hojalygy, gozgalmaýan emläk, buraw işleri we guýulary gurmak ulgamlaryna wekilçilik edýän öňdebaryjy holdingleriniň hem-de kompaniýalarynyň ýolbaşçylary girýär. Olar türkmen ykdysadyýetine maýa goýumlary gönükdirmegiň mümkinçiliklerini jikme-jik öwrenmegi meýilleşdirýärler.
Forumyň çykyş edijileriniň düzümi aýratyn ýokary abraýa eýe bolup, oňa Bütindünýä bankynyň, Ýewropanyň täzeleniş we ösüş bankynyň, Halkara maliýe korporasiýasynyň, Aziýa ösüş bankynyň wekilleri, şeýle hem Ýewropa Bileleşiginiň we Beýik Britaniýanyň diplomatik wekilhanalarynyň ýolbaşçylary girýär. Ministrler derejesinde gatnaşjakdyklaryny Niderlandlaryň, Türkiýäniň, Pakistanyň, Ermenistanyň, Gyrgyzystanyň we Saud Arabystanynyň resmi wekilleri hem tassykladylar. «TIF 2026» forumynyň guramaçylary hökmünde Türkmenistanyň Maliýe we ykdysadyýet ministrligi hem-de Türkmenistanyň Daşary işler ministrligi «Türkmen Kongres» kompaniýasy bilen hyzmatdaşlykda çykyş edýärler.
Forum barada giňişleýin maglumat bilen onuň resmi internet sahypasynda tanyşmak bolýar: tif-turkmenistan.com
