7-nji ýanwardan 8-ine geçilýän gije Ispaniýanyň Superkubogynyň 1/2 final duşuşygy geçirildi. Onda «Barselona» we Bilbaonyň «Atletik» toparlary özara güýç synanyşdy. Saud Arabystanynyň Jidda şäherinde geçirilen oýun «Barsanyň» 5:0 hasabyndaky uly ýeňşi bilen tamamlandy.
Oýnuň 22-nji minutynda «Barselonanyň» hüjümçisi Ferran Torres hasaby açyp, öz klubyny öňe saýlady. 30-njy minutda ýarym goragçy Fermin Lopes hasaby ýene artdyrdy. 34-nji minutda katalonlylaryň ganatdaky hüjümçisi Runi Bardji hasaby 3:0-a ýetirdi. 39-njy minutda braziliýaly Rafinýa dördünji goly derwezä dürs gönükdirdi. 52-nji minutda bolsa Rafinýanyň dubly duşuşygyň soňky nokadyny goýdy.
Şeýlelikde, «Barselona» Ispaniýanyň Superkubogynyň 11-nji ýanwarda — ýekşenbe güni geçiriljek finalyna çykdy.
«Barsanyñ» finaldaky garşydaşy Madrid derbisinde — «Atletiko» we «Real» toparlarynyň arasyndaky oýunda belli bolar. Bu jübüdiň duşuşygy 8-nji ýanwarda geçiriler. Oýny «Матч ТВ» telekanaly göni ýaýlymda görkezer. Görkeziliş Aşgabat wagty bilen sagat 23:55-de başlanar.