Golaýda Brýusselde Türkmenistanyň hemişelik bitaraplygynyň 30 ýyllygyna bagyşlanyp guralan dabaraly kabul edilişligiň iň ýatda galyjy hem duýguly pursatlaryň biri-de «Belgiýanyň gözeli» bäsleşiginiň finalçylarynyň türkmen milli lybaslarynda myhmanlaryň öňüne çykmagy boldy. Bu waka hormatyň we dostlugyň beýanyna, medeni dialogyň nyşanyna öwrüldi.
Finalçylaryň adyndan çykyş eden gyzlaryň biri ýokary derejeli myhmanlara ýüzlenip, bu çäräniň olar üçin diňe ajaýyp kabul edilişlik bolman, has giň mazmuna eýedigini belledi. «Bu waka bize gündelik durmuşda aýdýan gymmatlyklarymyzyň — parahatçylyk, hormat, ynam, jebislik düşünjelerimiziň diňe sözden ybarat däldigini ýatlatdy. Bu gymmatlyklar döwletleriň arasyndaky gatnaşyklary şöhlelendirýär, şeýle hem biziň birek-birege garaýşymyz bilen bagly saýlap alýan aýratynlyklarymyzy görkezýär» — diýip, ol ähmiýetli çäre hakyndaky pikirini beýan etdi.
«Hakyky gözellik adamlaryň ýa-da medeniýetleriň arasyndaky bäsleşik däl, ol her bir adamyň gymmatynyň ykrar edilmegi we aramyzda köprüleriň gurulmagydyr. Hut şonuň üçin hem, biziň şu agşam türkmen milli lybaslarynda çykmagymyz möhüm ähmiýete eýedir. Munuň özi Türkmenistanyň baý medeniýetine goýlan hormatyň hem-de halklarymyzyň arasyndaky dostlugyň nyşanydyr».
Finalçy Türkmenistanyň parahatçylyga ygrarlylygynyň nesilleri ruhlandyrmak bilen, dialogdan peýdalanmagyň güýjüne öwrülendigini tassyklady.
