18-nji sentýabrda Türkmenistanyň Bilim ministrliginde Beýik Britaniýanyň «AQA Global Assessment Services» guramasynyň wekiliýeti bilen resmi duşuşyk geçirildi. Wekiliýetiň düzüminde halkara işewür, guramanyň ösüş boýunça direktory jenap Şon Krouli, baha beriş ulgamlary boýunça direktory hanym Anna Grin we sebit geňeşçisi jenap Wali Guseýin bar.
Bilim ministriniň orunbasary Azat Ataýew «AQA» bilen hyzmatdaşlygy ösdürmäge uly gyzyklanma bildirýändigini, bilimiň hilini ýokarlandyrmakda öwrenilýän netijeleri bahalandyrmagyň öňdebaryjy usullaryny ornaşdyrmagyň wajypdygyny belledi. Hyzmatdaşlygyň ileri tutulýan ugurlarynyň biri hökmünde talyplaryň jemleýji baha ulgamyny kämilleşdirmek we bilim netijelerini zähmet bazarynyň talaplaryna laýyk getirmek meselesi görkezildi.
Ýeri gelende bellesek, «AQA Global» dünýäniň dürli ýurtlarynda, şol sanda Merkezi Aziýa döwletlerinde — Gazagystanda, Özbegistanda we Gyrgyzystanda onlarça taslamany üstünlikli durmuşa geçirdi. Guramanyň goldawy milli jemleýji attestasiýa ulgamlarynyň ornaşdyrylmagy, hünär standartlaryny standartlaşdyrmak boýunça özgertmeleriň goldanylmagy, synag ulgamynyň sanlylaşdyrylmagy, bilim syýasaty boýunça hökümetlere metodiki goldawyň berilmegi ýaly ugurlary özünde jemleýär.
Mysal üçin, «AQA» Özbegistanda ýokary synp okuwçylary üçin täze baha beriş modeliniň taýýarlanmagyna we synagdan geçirilmegine gatnaşdy. Bu modeliň üsti bilen milli synaglar halkara standartlara integrirlenip, baha beriş ulgamynyň aç-açanlygy ýokarlandyryldy. Gazagystanda derejelere esaslanýan baha beriş modeline geçişe ýardam edip, şol model esasynda mekdepleriň we ýokary okuw mekdepleriniň uçurymlaryna bolan täze hünär talaplary döredildi.
Duşuşykda taraplar hyzmatdaşlygyň mümkinçilikleri boýunça pikir alyşdylar. Jemleýji sertifikasiýa we synag platformalarynyň gurnalmagy boýunça «AQA-nyň» tejribesini öwrenmek, bilim netijeleriniň analitiki seljerilişini amala aşyrýan sanly çözgütler, baha bermek we hünär standartlaryny bilelikde işläp düzmek, mugallymlary we baha beriş ulgamynyň administrasiýasyny taýýarlamakda metodiki goldaw meseleleri ara alnyp maslahatlaşyldy.
Galyberse-de, halkara ülňülere laýyk gelýän bilim ulgamyny seljermek we meýilleşdirmek boýunça metodiki çemeleşmelere seredildi. Şunuň netijesinde maglumatlara esaslanýan, tapgyrlaýyn we durnukly meýilleşdiriş mehanizmini döretmek mümkin bolar. Bu bolsa amala aşyrylýan özgertmeleriň netijeliligini we täsirini ýokarlandyrar.
