Düýn — 25-nji dekabrda paýtagtymyzdaky «Mekan» köşgünde Türkmenistanyň Halk Maslahatynyň guramagynda «Halkara parahatçylyk we ynanyşmak ýyly: Bitarap Türkmenistanyň ynamly gadamlary» atly dabara geçirildi. Oňa Hökümet agzalary, ýurdumyzyň diplomatik gullugynyň, daşary döwletleriň we halkara guramalaryň Aşgabatdaky diplomatik wekilhanalarynyň ýolbaşçylarydyr wekilleri, dürli pudaklarda zähmet çekýän raýatlar, ýaşlar gatnaşdylar.
Dabaranyň geçirilýän ýerinde medeniýet we sungat ussatlarynyň aýdym-sazly çykyşlary ýaýbaňlandyryldy. Dabara gatnaşyjylar halkymyzyň medeni mirasyna, Garaşsyzlygyň we hemişelik Bitaraplygyň aýdyň ýolunda ýurdumyzyň gazanan üstünliklerine bagyşlanan sergini synladylar.
Soňra dabara «Mekan» köşgüniň mejlisler zalynda dowam etdi. Türkmenistanyň Halk Maslahatynyň Diwanynyň iş dolandyryjysy R.Bazarow dabara gatnaşyjylary mübärekläp, «Halkara parahatçylyk we ynanyşmak ýyly: Bitarap Türkmenistanyň ynamly gadamlary» atly dabaranyň möhüm ähmiýetini belledi.
Soňra Türkmenistanyň Döwlet senasy ýerine ýetirildi.
Ministrler Kabinetiniň Başlygynyň orunbasary, daşary işler ministri R.Meredow örän möhüm jemgyýetçilik-syýasy waka — Türkmenistanyň Halk Maslahaty tarapyndan guralýan «Halkara parahatçylyk we ynanyşmak ýyly: Bitarap Türkmenistanyň ynamly gadamlary» atly dabara gatnaşyjylary mähirli mübärekläp, 2025-nji ýylyň Türkmenistanyň taryhynda, onuň döwletlilik ýörelgeleriniň, syýasy, ykdysady, durmuş ösüşiniň pugtalanmagynda möhüm tapgyr bolandygyny belledi. Gahryman Arkadagymyzyň hem-de Arkadagly Gahryman Serdarymyzyň giň gerimli döwlet işleriniň netijesinde 2025-nji ýyl ýurdumyzyň içeri we daşary syýasatynda gazanylan uly üstünlikler, ýetilen belent sepgitler bilen dabaralandy.
Şondan soň Türkmenistanyň Birleşen Milletler Guramasynyň ýanyndaky hemişelik wekili, Türkmenistanyň Gahrymany A.Ataýewa çykyş etdi. Bu ýerde Birleşen Milletler Guramasynyň Çagalar gaznasynyň Türkmenistandaky wekili Jalpa Ratna, Amerikanyň Birleşen Ştatlarynyň Türkmenistandaky Adatdan daşary we Doly ygtyýarly ilçisi Elizabet Ruda, Germaniýa Federatiw Respublikasynyň Türkmenistandaky Adatdan daşary we Doly ygtyýarly ilçisi Bernd Haýnsä, Özbegistan Respublikasynyň Türkmenistandaky Adatdan daşary we Doly ygtyýarly ilçisi Rawşanbek Alimowa, Eýran Yslam Respublikasynyň Türkmenistandaky Adatdan daşary we Doly ygtyýarly ilçisi Ali Mojtaba Ruzbehanä, Mary welaýatynyň Wekilbazar etrabynyň ýaşaýjysy B.Hojaberdiýewe, Halkara ynsanperwer ylymlary we ösüş uniwersitetiniň mugallymy Ç.Wekilowa, Türkmenistanyň Daşary işler ministrliginiň Halkara gatnaşyklary institutynyň talyby O.Sähetmyradowa söz berildi.
Soňra daşary ýurt döwletleriniň we halkara guramalaryň Türkmenistandaky diplomatik wekilhanalarynyň ýolbaşçylaryny hem-de ýurdumyzyň raýatlaryny «Türkmenistanyň Bitaraplygynyň 30 ýyllygyna» atly Türkmenistanyň ýubileý medaly hem-de ýadygärlik kümüş nyşany bilen sylaglamak dabarasy boldy.
Dabaranyň ahyrynda Ministrler Kabinetiniň Başlygynyň orunbasary, daşary işler ministri R.Meredow çykyş edip, «Halkara parahatçylyk we ynanyşmak ýyly: Bitarap Türkmenistanyň ynamly gadamlary» atly dabarada Türkmenistanyň hemişelik Bitaraplygy, bitaraplyk ýörelgeleriniň we öňüni alyş diplomatiýasynyň iş ýüzünde durmuşa geçirilmegi, parahatçylyk, ynanyşmak, dialog medeniýetiniň ähmiýeti barada çuňňur many-mazmunly çykyşlaryň diňlenilendigini aýtdy. Bellenilişi ýaly, Birleşen Milletler Guramasynyň Baş Assambleýasynyň Kararnamasy bilen «Halkara parahatçylyk we ynanyşmak ýyly» diýlip yglan edilen 2025-nji ýyl ýubileý ýyl bolup, örän möhüm taryhy wakalara beslendi. Şu ýyl dünýä bileleşigi bilen bilelikde Türkmenistanyň hemişelik Bitaraplygynyň 30 ýyllygy halkara derejede giňden bellenilip geçildi.