«Nesil» gazetiniň redaksiýasy Türkmenistanyň Magtymguly adyndaky Ýaşlar guramasynyň Merkezi geňeşi bilen bilelikde ýurdumyzyň döredijilik bilen meşgullanýan ýaşlarynyň arasynda «Ýaşlaryň döredijiligi — parahatçylygyň owazy» atly döredijilik bäsleşigini yglan edýär. Bu barada «Nesil» gazetiniň şu günki — 28-nji oktýabrdaky sanynda bildiriş berildi.
Bäsleşik Halkara parahatçylyk we ynanyşmak ýylyny hem-de Birleşen Milletler Guramasy tarapyndan üç gezek ykrar edilen hemişelik Bitaraplygymyzyň 30 ýyllygyny dabaralandyrmak, parahatçylyk, ynanyşmak, ynsanperwerlik we dost-doganlyk ýörelgelerini ýaş nesilleriň arasynda giňden wagyz etmek, şeýle hem döredijilik bilen meşgullanýan ýaşlary ýüze çykarmak maksady bilen ýaýbaňlandyrylýar.
Bäsleşik döredijiligiň şu ugurlary — publisistik makalalary, hekaýalary, goşgulary ýazmak boýunça geçirilýär. Oňa gatnaşyjylar ýurdumyzda gazanylýan üstünlikleri, watansöýüjiligi, hemişelik Bitaraplygymyzy we parahatçylygy, dost-doganlygy wasp edýän döredijilik eserlerini 2025-nji ýylyň 10-njy dekabryna çenli bäsleşige hödürläp bilerler.
Bäsleşige gatnaşyjylar öz işlerini «Ýaşlaryň döredijiligi — parahatçylygyň owazy» diýen ýazgy bilen hödürläp, ýanyna özleri baradaky maglumatlary (maglumatnama, pasportyň nusgasy, 2 sany 3x4 ölçegdäki fotosurat, ýaşaýan ýeriniň anyk salgysy, telefon belgisi) goşmalydyrlar.
Hödürlenen döredijilik eserleriniň iň gowularyny saýlap-seçmek üçin guramaçylar tarapyndan eminler topary döredilýär.
Bäsleşigiň jemleri Halkara Bitaraplyk güni mynasybetli 2025-nji ýylyň dekabr aýynda jemlener. Ýeňijilere Hormat hatlary we gymmat bahaly sowgatlar, şeýle-de tapawutlanan döredijilik eserleri üçin höweslendiriji baýraklar dabaraly ýagdaýda gowşurylar.
Bäsleşige ýaşy 35-e çenli bolan ýaşlar gatnaşyp bilerler.
Bäsleşige hödürlenýän işleri şu salga ibermeli:
Aşgabat şäheri, 744604, Garaşsyzlyk şaýoly, Erkin döredijilik mekany, «Nesil» gazetiniň redaksiýasy.
E-mail salgysy: nesil-gazeti@sanly.tm