Angliýanyň milli ýygyndysy 2026-njy ýylyň futbol boýunça dünýä çempionatynyň ýarym finalyna çykmagy başardy. «Hard Rock» stadionynda geçirilen dartgynly çärýek final duşuşygynda iňlisler Norwegiýany 2:1 hasabynda ýeňdiler.
Duşuşyk ýokary depginde geçdi. Norwegiýa Erling Holandyň ýolbaşçylygyndaky hüjümleri bilen howply pursatlaryň ençemesini döretdi. Emma Angliýa tutanýerliligini görkezip, hasaby deňledi. Esasy wagt 1:1 hasabynda tamamlandy we ýeňijini kesgitlemek üçin goşmaça wagt bellenildi.
Goşmaça wagtyň ilkinji minutlarynda Jud Bellingem öz ussatlygyny görkezdi we Angliýa üçin ýeňiş goluny geçirdi. Şeýlelikde iki gol geçiren ýyldyzyň ajaýyp çykyşy duşuşygyň ykbalyny kesgitledi. Netijede Angliýa 2:1 hasabynda ýeňiş gazanyp, ýarym finala çykdy.
Argentinanyň milli ýygyndysy bolsa Şweýsariýany 3:1 hasabynda ýeňdi we ýarym finalda çykyş etmäge hukuk gazandy. Kansas-Sitidäki «Arrowhead» stadionynda geçirilen duşuşyk ýokary depginde geçdi we janköýerlere köp sanly ýiti pursatlary sowgat etdi.
Duşuşygyň birinji ýarymynda topy has köp özünde saklan Argentinanyň ýygyndysy irginsiz hüjümlerini gowşatmady we öňe saýlandy. Bu goly 10-njy minutda Mak Allister geççirdi. Şweýsariýa ikinji ýarymda Dan Ndoýyň goly bilen hasaby deňledi, emma günorta amerikalylar tiz wagtda oýny täzeden ele almagyň hötdesinden geldiler. Duşuşygyň dowamynda Şweýsariýanyň hüjümçisi Breel Embolo ikinji sary kartdan soň meýdançadan çykaryldy, bu bolsa toparyň işini has-da kynlaşdyrdy.
Esasy wagtyň deňlikde jemlenmegi netijesinde duşuşygyň ykbalyny goşmaça wagt kesgitledi. Şeýlelikde, Alwaresiň hem-de Martinesiň gollary Argentinany öňe çykarýar — 3:1.
Şeýlelikde, dünýä çempionatynyň ýarym finalynda Argentina Angliýa bilen duşuşar.
