Dünýä çempionatynyň geçen agşam ABŞ-nyň Kaliforniýa ştatynyň Inglwud şäherindäki «SoFi» stadionynda geçirilen çärýek final duşuşygynda Ispaniýa bilen Belgiýanyň milli ýygyndylary duşuşdy. Köp sanly howply pursatlar bilen geçen oýunda Ispaniýa 2:1 hasabynda ýeňiş gazanyp, dünýä çempionatynyň ýarym finalyna çykmagy başardy.
Toparlaryň ikisi-de duşuşygyň başyndan ahyryna çenli hüjüm futbolyny görkezdi. Ispaniýa topa has köp eýelik edip, gysga paslar arkaly garşydaşynyň goragyny böwüsmegi maksat başardy. Belgiýa bolsa tiz garşylyklaýyn hüjümlere bil baglady we birnäçe gezek howply pursat döretdi.
Oýnuň birinji ýarymynda Ispaniýa has işjeň çykyş edip, ilkinji goly geçirmegi başardy. Bu gol toparyň ynamyny has-da artdyrdy. Belgiýa bolsa yza çekilmedi we ikinji ýarymda hüjümlerini güýçlendirip, Çarlz De Ketelaereniň dürs urgusy bilen hasaby deňledi. Şeýlelikde, duşuşyk täzeden dartgynly häsiýete eýe boldy.
Hasap deňlenenden soň iki topar hem ýeňiş goluny geçirmek üçin ähli mümkinçiligini ulandy. Oýnuň soňky böleklerinde Ispaniýanyň tejribeli ýarym goragçysy Mikel Merino geçiren goly ýagdaýy has-da dartgynlaşdyrdy. Galan minutlarda hasaby hasaby deňlemek ugrundaky dartgynly synanyşyklaryna garamazdan, Belgiýa ýagdaýy üýtgedip bilmedi. Ispan goragy ynamly çykyş edip, artykmaçlygyny saklap galdy.
Bu ýeňiş Ispaniýanyň Dünýä çempionaty 2026-daky üstünlikli ýörişiniň dowam edýändigini görkezdi. Topar çärýek finalda diňe bir netijeli oýun görkezmän, eýsem, psihologik taýdan hem durnuklydygyny subut etdi. Belgiýa bolsa ýaryşa mynasyp göreşip gatnaşandygyna garamazdan, çärýek finalda ýaryş bilen hoşlaşmaly boldy.
Şeýlelikde, Ispaniýa 2:1 hasabyndaky ýeňşi bilen ýarym finala çykdy. Indi ispanlary ýarym finalda güýçli garşydaş hasaplanýan Fransiýanyň milli ýygyndysy garşy alar. Futbol janköýerleri bu duşuşygy dünýä çempionatynyň iň gyzykly oýunlarynyň biri hasaplaýarlar. Ispaniýanyň häzirki ýagdaýy olaryň çempionlyk ugrundaky esasy dalaşgärleriň biridigini ýene bir ýola subut etdi.
