Halkara Futbol Federasiýasy (FIFA) ýaş zehinleri taýýarlamak maksatnamasyny düýpli giňeltmegi meýilleşdirýär. Futboly bütindünýä derejesinde ösdürmek bölüminiň ýolbaşçysy Arsen Wenger 100 döwletde ýöriteleşdirilen akademiýalary açmak meýilnamasyny yglan etdi. Onuň sözlerine görä, bu taslama ýaş oýunçylaryň mümkinçiliklerini durmuşa geçirmäge we bütin dünýäde ýokary hilli tälim almak üçin deň şertleri üpjün etmäge gönükdirilendir.
Häzirki wagtda şuňa meňzeş merkezler eýýäm 60 ýurtda hereket edýär. Wenger soňky 10 ýylyň içinde adatça Ýewropadan yza galýan sebitleri goldamak boýunça örän uly işleriň bitirilendigini belledi. Ulgamlaýyn çemeleşmäniň netijesinde dürli yklymlarda futbolyň umumy derejesi kem-kemden deňleşýär, bäsdeşlik bolsa has ýokary hile eýe bolýar.
FIFA-nyň başlangyjy diňe türgenleşik bilen çäklenmeýär. Taslama doly derejeli ýaryşlar ulgamyny döretmegi hem göz öňünde tutýar. Her ýyl geçirilýän 17 ýaşlylaryň arasyndaky dünýä çempionatyna goşmaça hökmünde gurama 15 ýaşlylar üçin hem giň gerimli festiwal geçirmegi meýilleşdirýär. Täze ýaryşyň esasy aýratynlygy saýlama tapgyrlarynyň bolmazlygydyr: dünýä derejesinde çykyş etmäge FIFA-nyň düzümine girýän 211 milli assosiasiýanyň ählisiniň wekilleri mümkinçilik alar.
«Biz göni ýurtlaryň içinde işleýäris: zehinleri ýüze çykarýarys, olara tälim berýäris we halkara meýdançasynda özlerini görkezmäge mümkinçilik döredýäris» diýip, Arsen Wenger belledi.
Bilermeniň pikiriçe, şeýle ekoulgamyň döredilmegi ýaş futbolçylaryň geografiki ýerleşişine garamazdan, hünär derejesinde ösmegine ýardam eder.
