«Ford» kompaniýasy ýolsuz ýerde hereket edýän çarçuwasyz awtoulaglarynyň iň güýçli görnüşi bolan «Everest Tremor» nusgasyny tanyşdyrdy: täze model Abu-Dabidäki «Liwa» festiwalynda ilkinji gezek görkezildi.
Esasy täzelik — standart dwigatelleriň ýerine 2,7 litrlik, goşa turboly «V6 EcoBoost» benzin hereketlendirijisiniň goýulmagy boldy. «F-150» we «Ranger» pikaplaryndan tanyş bolan bu agregat 350 at güýjüni we 500 Nm öwrüm mümkinçiligini üpjün edýär. Dwigatel 10 basgançakly «awtomat» geçiriji guty we doly çekiji ulgam bilen utgaşykly işleýär. Deňeşdirmek üçin bellesek, «Everest Tremor» awtoulagynyň Awstraliýa üçin dizel görnüşi bary-ýogy 247 at güýjüni öndürýär, ýöne dizeliň öwrüm pursaty has ýokary — 600 Nm.
Daşky görnüşi boýunça Ýakyn Gündogar üçin niýetlenen «Tremor» ulagyň Awstraliýa üçin döredilen nusgasyny gaýtalaýar: ýolsuz ýerde hereket etmäge ukyply awtoulag 26 mm beýgeldilen (liftli) «Bilstein» galdyryjysy, güýçlendirilen aşaky goragy, «General Grabber AT3» tekerleri dakylan 17 dýuymlyk diskler we agyr şertli ýerlerde iň pes tizlikde hereket etmek üçin ýörite «Rock Crawl» tertibi bilen enjamlaşdyrylandyr.
«Ford» täze güýç gurluşynyň «Everest» ulagyny öz derejesiniň iň güýçli awtoulaga öwürýändigini belleýär. Onuň esasy bäsdeşleri hökmünde «Toyota Land Cruiser Prado», «Toyota Fortuner», «Mitsubishi Montero Sport» we «Nissan X-Terra» ýaly modeller görkezilýär.