21-25-nji iýul aralygynda paýtagtymyzdaky “Aşgabat” köpugurly stadionynyň türgenleşik meýdançasynda 2011-nji ýylda doglan ýetginjekleriň arasynda tomusky dynç alyş möwsümine bagyşlanan futbol bäsleşigi geçirildi. GOÝÇÝSM-niň (Geljekki olimpiýaçylaryň ýöriteleşdirilen çagalar-ýetginjekler sport mekdebi) açyk birinjiligini almak ugrundaky bäsleşigiň deslapky tapgyrynda toparlar “A” hem-de “B” toparçalar geçirilen duşuşyklarda ýarymfinalçylary kesgitlediler. Toparlaryň 8-siniň gatnaşmagynda geçirilen deslapky tapgyryň netijesi boýunça “Gala” hem-de Mary welaýatynyň “Ýaşlyk” toparlary ýarymfinala çykmagy başardylar. Esasy wagty 1:1 hasabynda tamamlanan duşuşygyň ýeňijisi oýundan soňky bellenen 11 metrlik urgularda kesgitlenildi. Bellenen urgulary has şowly ýerine ýetiren “Gala” garşydaşyndan 5:3 hasabynda üstün çykyp, finala gatnaşýan ilkinji topar boldy. Ikinji finalçyny kesgitleýän duşuşyk bolsa, “Kuwwat” bilen “Merwiň” arasynda geçirildi. Bu duşuşykda garşydaşynyň derwezesinden netijeli urgularyň üçüsini geçiren “Kuwwat” (3:0) aýgytlaýjy duşuşykda güýç synanyşmaga mümkinçilik aldy.
Şeýlelikde, üçünji orun ugrundaky duşuşykda “Merwiň” oglanlary “Ýaşlygy” 3:0 hasap bilen utup, bürünç medala mynasyp boldular.
“Kuwwat” bilen “Galanyň” arasynda dowam eden final duşuşygy çekeleşikli pursatlara we gollara baý boldy. “Galanyň” ezber oýunçylary “Kuwwatyň” derwezesine jogapsyz 5 goly girizmegi başardylar. Netijede, “Gala” final oýnunda “Kuwwaty” 5:0 hasap bilen ýeňip, baş baýraga mynasyp boldy.
“Galanyň” düzüminden Artýom Çernow final oýnunda derwezä 4 goly geçirmegi başardy we jemi 7 gol bilen bäsleşigiň iň netijeli oýunçysy boldy.
