Sekiz gezek «Altyn top» baýragyny eýelän argentinaly rowaýaty hüjümçi özüniň ussatlygyny bireýýäm subut edipdi, emma ol 39 ýaşynda hem janköýerleri haýran galdyrmagyny dowam etdirýär. «MLS» ligasynyň nobatdaky duşuşygynda Leo Messi jerime urgusynda ajaýyp gol geçirip, hatda garşydaş toparyň janköýerlerini hem el çarpmaga mejbur etdi.
Şowsuzlygyň arasyndaky ýatdan çykmajak pursat
28-nji sentýabra geçilen gije «Inter Maýami» myhmançylykda «Kolambus Krýu» topary bilen duşuşdy. Bu oýun Messiniň kluby üçin ýeňliş bilen tamamlandy.
Şonda-da «Interiň» janköýerleri begenmäge sebäp tapdylar. 39 ýaşly Messi diýseň kyn nokatdan — meýdançanyň sag gyraky burçynyň golaýyndan ýerine ýetiren jerime urgusyny gol bilen jemledi.
Bu gol Messiniň klubyň düzüminde geçiren 102-nji, professional karýerasyndaky bolsa 931-nji goly boldy. Hüjümçiniň özi bu üstünligi örän begenip garşylady, emma «Kolambusyň» janköýerleri hem öz duýgularyny gizläp bilmediler: toparyň gol geçirdendigine garamazdan, stadiondaky köp sanly janköýer bu ajaýyp goly aýak üstünde el çarpyp garşylady.
Esasy wagt deňlik bilen tamamlanmaga ýakyndy, emma goşmaça wagt ähli zady üýtgetdi: ilki 96-njy minutda Messiniň topardaşy goragçy Santýago Morales meýdançadan çykaryldy, 99-njy minutda bolsa garşydaş klubyň geçiren goly «Inter Maýami» toparyna ýeňlişine sebäp boldy.
Taryhy rekorda bir ädim galdy
Jerime urgusyndan geçirilen bu top argentinaly ýyldyzyň karýerasyndaky 76-njy gol boldy. Şeýlelikde, Messä braziliýaly Marselino Karioka degişli bolan dünýä rekordyna ýetmek üçin diňe iki gol geçirmek galýar.
