Türkmenistanyň Medeniýet ministrliginiň Şekillendiriş sungatynyň sergi merkezinde Türkmenistanyň sungatda at gazanan işgäri Oraz Agabaýewiň 70 ýaş ýubileýine bagyşlanan şahsy grafika sergisi açyldy. Sergi myhmanlarda uly täsir galdyrdy: suratkeşiň eserleri bilen birinji gezek tanyş bolan tomaşaçylar onuň işlerine haýran galdylar, ony öňden tanaýanlar bolsa halypany üstünlikli döredijiligi bilen gutladylar. Serginiň açylyş dabarasynda sungat işgärleri we myhmanlar hormatly suratkeşe öz hoşallyklaryny bildirdiler.
1976-njy ýylda Türkmen döwlet ýörite çeperçilik mekdebini tamamlanyndan soň Oraz Agabaýew çopanlar barada grafika taýdan kitap taýýarlady. Bu eser suratkeşiň şeýle bir ünsüni çekdi welin, ol onuň döredijiliginiň möhüm bir bölegi boldy. Şeýlelikde, biziň ýurdumyzda başga suratkeşleriň eserlerine meňzemeýän özboluşly grafika eserleri döredi. Çeperçilik sungatynyň bu görnüşine höwesi bolan Oraz Agabaýew bilimini Iwan Fýodorow adyndaky Ukrain poligrafik institutynyň grafika fakultetinde dowam etdirdi. Okuw döwründe ol grafika sungatynyň surat çekme, galam, kömür galam, estamp, haşamçylyk we litografiýa görnüşlerini başarýardy. Ol grafika degişli ähli zady öwrendi.
– Men döredijilikde adamyň ruhubelentligini, beýikligini we gözelligini wasp edýärin – diýip, Oraz Agabaýew aýdýar. – Adatça bir keşp barada oýlanýaryn, ýöne işimiň dowamynda nämedir bir zat maňa surata başga bir şekil goşmalydygymy aýdýar.
Sungaty öwreniji Oraz Agabaýewiň haýsy biçüwde işleýändigini bilmek üçin kelle döwýärler. Bir tarapdan, ol milli dünýäni duýşuna esaslanýar, beýleki tarapdan bolsa öz işini modern biçüwde alyp barýar. Oraz Agabaýewi öz işini gowy bilýän suratkeş hökmünde atlandyrýarlar. Düzgün boýunça, ol bir temadan başlaýar, emma oňa ýekeje surat ýetmeýär, oňa ikinji, üçünji, dördünji surat gerek bolýar. Şeýlelik bilen hem «Magtymguly sözlär tili türkmeniň», «Meniň Watanym», «Miras», «Oguz äheňleri», «Dört çemen» we beýleki suratlary döredi.
