11-nji awgustda döwrümiziň waspçysy Amangözel Şagulyýewa 85 ýaşady. Türkmenistanyň Prezidenti Serdar Berdimuhamedow hem-de türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow ýurdumyzyň Gahrymany Amangözel Şagulyýewany 85 ýaşynyň dolmagy bilen gutladylar. Gutlaglarda şeýle diýilýär:
Hormatly Türkmenistanyň Gahrymany Amangözel Şagulyýewa!
Sizi Halkara parahatçylyk we ynanyşmak ýylynda 85 ýaşyňyzyň dolmagy mynasybetli tüýs ýürekden gutlaýaryn. Size berk jan saglyk, maşgala abadançylygyny, döredijilik dünýäsinde uly üstünlikleri arzuw edýärin.
Berkarar döwletiň täze eýýamynyň Galkynyşy döwründe milli medeniýetimizi, sungatymyzy, edebiýatymyzy ösdürmäge uly üns berilýär. Häzirki döwürde ýurdumyzyň ýazyjy-şahyrlary öz kämil, döwrebap eserleri bilen türkmen edebiýatyny has-da baýlaşdyrmaga, kämilleşdirmäge uly goşant goşýarlar. Edebiýatyň kämilligi ýurduň döredijilik kuwwatyny artdyrmaga, raýatlaryň kalbynda watançylyk duýgusyny ösdürmäge uly ýardam berýär. Şahyr üçin Watany wasp etmekden uly bagt ýokdur. Watan ezizligi, toprak mukaddesligi, halkyň agzybirligi şahyr kalbyny ganatlandyrýan gymmatlyklardyr.
Hormatly Amangözel Şagulyýewa!
Biz Siziň mähriban Watanymyzyň beýik ösüşlerini, döwrümiziň taryhy wakalaryny wasp edip ýazýan goşgularyňyza we poemalaryňyza örän guwanýarys. Ýurdumyzda giňden bellenilýän şanly senelerde, şeýle-de teleradioýaýlymlarda Siziň sözleriňize döredilen aýdymlary sungat ussatlarymyz uly joşgun bilen ýerine ýetirýärler. Siziň ýazýan eserleriňiz Diýarymyzyň ýaş nesillerini watançylyk ruhunda terbiýelemekde, jemgyýetimizde agzybirlik, ynsanperwerlik, halallyk ýörelgelerini dabaralandyrmakda möhüm ähmiýete eýedir.
Döwrümiziň waspçysy Amangözel Şagulyýewa!
Häzirki zaman türkmen edebiýatynyň kemala gelmegine we ösdürilmegine meşhur ýazyjy-şahyrlarymyz uly goşant goşdular. Ussat ýazyjy-şahyrlarymyzdan gelýän döredijilik ýoluny dowam edip, türkmen edebiýatynyň has-da kämilleşmeginde Siziň hem köpýyllyk yhlasly zähmetiňiziň bardygyny aýratyn bellemek isleýärin. Biz ata-babalarymyzyň asyrlaryň dowamynda kämilleşdiren halypa-şägirtlik ýörelgesine uly ähmiýet berýäris. Siz hem türkmen şahyrlarynyň täze neslini kemala getirmek ugrunda nusga alarlyk işleri bitirýärsiňiz. Siziň baý döredijilik mekdebiňizi geçen, edebiýat meýdanynda öz sesi bilen tanalýan şahyrlaryň täze nesli kemala geldi. Häzirki döwürde ýurdumyzda geçirilýän medeni çärelerde, şygryýet agşamlarynda çykyş edýän şahyrlarymyzyň kämil eserleri döretmeklerinde Siziň mynasyp hyzmatyňyz bardyr.
Hormatly halypa şahyrymyz!
Siz köp ýyllaryň dowamynda kämil eserleri döredip, Watana, halka ak ýürekden hyzmat etdiňiz. Özüňiziň ukyp-başarnygyňyzy, yhlasly zähmetiňizi edebiýata bagyşladyňyz. Döwletimiziň özygtyýarlylygyny pugtalandyrmakda, halkymyzyň agzybirligini, ýurdumyzyň abadançylygyny wasp etmekde alyp baran giň gerimli işleriňiz, Watan öňündäki bitiren hyzmatlaryňyz nazara alnyp, Size «Türkmenistanyň Gahrymany» diýen belent dereje berildi, «Türkmenistanyň halk ýazyjysy» diýen hormatly at dakyldy, şeýle hem Siz Magtymguly adyndaky halkara baýraga, birnäçe döwlet sylaglaryna mynasyp bolduňyz. Bularyň ählisi döredijilikli zähmetiňiziň ajaýyp miweleridir.
Siz türkmen edebiýatynyň gazananlaryny dünýäde giňden wagyz etmäge, daşary ýurtly okyjylary türkmen şygryýeti bilen giňden tanyşdyrmaga hem uly goşantlaryňyzy goşduňyz. Siz dünýäniň onlarça ýurdunda geçirilen çärelerde çykyş etdiňiz, daşary döwletleriň meşhur ýazyjy-şahyrlarynyň eserlerini türkmen diline terjime edip, halkymyza ýetirdiňiz. Hut şoňa görä-de, Siziň ýiti zehiniňize we gaýratly zähmetiňize dostlukly ýurtlarda hem uly sarpa goýulýar, eserleriňiz daşary ýurtlarda-da neşir edilýär. Siziň ýiti galamyňyzdan çykan ençeme kitaplar okyjylar tarapyndan söýlüp okalýan eserlere öwrüldi. Bu kitaplarda ündelýän pikirler Siziň ýürek sesiňizdir, döwrüň beýik ösüşleriniň joşgunly owazydyr.
Hormatly Amangözel Şagulyýewa!
Siziň geljekde hem ussat şahyr hökmünde ýaş ýazyjy-şahyrlarymyzy döredijiligiň ak ýoluna ruhlandyrjakdygyňyza, kämil eserleriňiz bilen bagtyýar halkymyzy begendirip durjakdygyňyza ynanýaryn. Sizi hemişelik Bitaraplygymyzyň şanly 30 ýyllyk baýramynyň şatlyk-şowhunly toýlanýan ýylynda bellenýän ýaş toýuňyz mynasybetli ýene-de bir gezek mähirli gutlaýaryn. Siziň janyňyz sag, ömrüňiz uzak, galamyňyz elmydama ýiti bolsun!
Türkmenistanyň Prezidenti
Serdar BERDIMUHAMEDOW.
***
Hormatly Türkmenistanyň Gahrymany Amangözel Şagulyýewa!
Sizi Halkara parahatçylyk we ynanyşmak ýylynda belleýän 85 ýaş ýubileýiňiz bilen tüýs ýürekden gutlaýaryn.
Berkarar döwletiň täze eýýamynyň Galkynyşy döwründe hormatly Prezidentimiziň baştutanlygynda milli medeniýetimiz, çeper söz sungatymyz döwrebap däpler esasynda yzygiderli baýlaşdyrylýar. Ýurdumyzda amala aşyrylýan taryhy özgertmeler, halkara giňişlikde gazanýan üstünliklerimiz, ilkinji nobatda, ýazyjy-şahyrlarymyzyň, žurnalistlerimiziň eserlerinde giňden şöhlelendirilýär. Bu babatda Siziň döredijiligiňize aýratyn ornuň degişlidigini bellemek ýakymlydyr. Siz döwrümiziň waspçysy hökmünde uzak ýyllaryň dowamynda baý many-mazmunly şygyrlaryňyzdyr uly göwrümli poemalaryňyz bilen gündelik metbugatda, teleradioýaýlymlarda yzygiderli çykyş edip, söze sarpa goýýan halkymyzyň hormatyny gazanmagy başardyňyz.
Adam ykballary, ynsan ömrüniň manysy barada kän oýlanýaryn. Men bu pikirlerimi «Ömrümiň manysy» atly kitabymda hem beýan etdim. Şol kitabymda Siziň köptaraply döredijiligiňiz, türkmen edebiýatynyň kämilleşmegine goşan şahsy goşandyňyz, ýurdumyzyň medeni we syýasy-jemgyýetçilik durmuşyndaky hyzmatlaryňyz dogrusynda pikirlerimi paýlaşdym.
Siziň şygyrlaryňyzda Watana bolan belent söýgi, pederlerimizden gelýän milli däplere ygrarlylyk, türkmen zenanyny bezeýän ajaýyp häsiýetler, perzent terbiýesi barada çuňňur manyly pikirler bar. Bu günki gün şol şygyrlaryňyz mähriban Watanymyz hakynda iň ajaýyp aýdym bolup ýaňlanýar. Diňe ykbalyny, bütin ömrüni Watanyndan aýra saýmaýan ynsanlaryň döreden eserleri hakydalarda hemişelik galýar. Çünki Siz her bir setiriňize yhlas siňdirmek bilen birlikde, döwrüň wakalaryna bada-bat seslenmegi hem başarýarsyňyz. Garaşsyz Diýarymyzda gazanylýan üstünlikler, döwlet durmuşynyň ähli ugurlarynda ýetilýän belent sepgitler, döwrüň wajyp wakalary Siziň şahyrana nazaryňyza ilýär. Bu bolsa ýüregi «Watan» diýip urýan, öz ykbalyny baglan kärine wepaly ynsanlara mahsus häsiýetdir.
Bu gün türkmen edebiýatynda däp bolan edebi ýoluň dowam etdirilmeginde, söz sungatymyzyň döwrüň ruhy bilen milli däpleriň sazlaşygy arkaly baýlaşmagynda Siziň aýratyn şahsy goşandyňyz bar. Uzak ýyllaryň dowamynda okyjylar tarapyndan gyzgyn garşylanan kitaplaryňyz türkmen şygryýetiniň many-mazmun we döwrebap däpler esasynda baýlaşmagyna saldamly goşant boldy. Size Watan öňündäki bitiren hyzmatlaryňyz üçin «Türkmenistanyň halk ýazyjysy», «Türkmenistanyň Gahrymany» diýen belent derejeler berildi, şeýle-de Siz Magtymguly adyndaky halkara baýraga we beýleki döwlet sylaglaryna mynasyp bolduňyz.
Döwrümiziň waspçysy Amangözel Şagulyýewa!
Ähli ugurlarda bolşy ýaly, biz ata-babalarymyzyň asyrlaryň dowamynda kämilleşdiren asylly däbi bolan halypa-şägirtlik ýörelgesine-de uly ähmiýet berýäris. Siz bu ugurda hem özboluşly mekdebi döredip, nusgalyk işleri bitirdiňiz. Siziň göreldäňizdir öwüt-nesihatlaryňyz bilen edebiýat meýdanyna gelen ýaşlar bu gün döwrümiziň sesine ses goşup, ýurdumyzyň üstünliklerini öz şygyrlarynda wasp edýärler. Siziň ömrüňiziň kämillik we döredijiligiňiziň gül açýan döwri eziz Watanymyz Garaşsyz Türkmenistanyň ösüşlere beslenýän, bagtyýar halkymyzyň eşretli durmuşyň hözirini görýän döwrüne gabat geldi. Şeýle bagtyýar, abadan, asuda durmuşymyz ömrüni Watana, ykbalyny şygryýete bagyşlan şahyr zenan üçin hakyky ylham akabasydyr. Türkmençilikde 85 ýaş goýazylygyň, nurana pähim-paýhaslylygyň hem-de kämilligiň iň belent derejesi hasaplanýar. Siziň döwrüň sesine ses goşýan, ýurdumyzyň üstünlikleriniň, ýeten belent sepgitlerimiziň waspyny ýetirýän ajaýyp eserleriňiz bilen okyjylary mundan beýläk-de begendirjekdigiňize ynanýaryn.
Hormatly Amangözel Şagulyýewa!
Sizi hemişelik Bitaraplygymyzyň şanly 30 ýyllyk toýunyň uludan dabaralandyrylýan ýylynda belleýän ýaş toýuňyz bilen ýene-de bir gezek mähirli gutlaýaryn. Siziň janyňyz sag, ömrüňiz uzak, maşgalaňyz abadan bolsun! Goý, mundan beýläk-de galamyňyz ýiti bolup, döredijilik ylhamyňyz joşup dursun!
Türkmen halkynyň Milli Lideri,
Türkmenistanyň Halk Maslahatynyň Başlygy,
Gahryman Arkadag Gurbanguly BERDIMUHAMEDOW.
