Rumyniýanyň «1-nji dekabr, 1918-nji ýyl» adyndaky uniwersitetinde talyp ylmy aragatnaşyklarynyň «IN-EXTENSO» atly 26-njy sessiýasy geçirildi. Alba-Ýuliýa şäherinde geçirilen bu giň gerimli ylmy forum täzeçil pikirleri we amaly taslamalary alyşmak maksady bilen, Ýewropanyň we Aziýanyň akademik toparlarynyň wekillerini birleşdirdi.
Şu ýyl sessiýanyň gatnaşyjylarynyň çägi has-da giňedi: oňa Fransiýanyň, Portugaliýanyň, Belgiýanyň, Moldowanyň, Polşanyň, Bosniýa we Gersegowinanyň, Rumyniýanyň, Türkiýäniň, Pakistanyň we Türkmenistanyň ýokary okuw mekdepleriniň talyplary hem-de mugallymlary gatnaşdylar.
Bu abraýly forumda ýurdumyza Halkara ynsanperwer ylymlary we ösüş uniwersitetiniň (HYYÖU) žurnalistika kafedrasynyň mugallymy Jennet Babaýewa wekilçilik etdi. Türkmenistanyň ýokary okuw mekdebiniň wekiliniň bu çärä gatnaşmagy milli ylmymyzyň halkara bilim giňişligine işjeň goşulyşýandygynyň aýdyň subutnamasydyr.
Bilermenler toparynyň garamagyna jemi 153 sany ylmy makala hödürlendi. Gatnaşyjylar diňe bir nazary barlaglary däl, eýsem, durmuşa geçirmäge taýýar bolan innowasion çözgütleri we amaly taslamalary hem tanyşdyrdylar.
Türkmen hünärmeni üçin «IN-EXTENSO» sessiýasyna gatnaşmak professional mugallymçylyk işinde we ylmy tejribe alyşmakda möhüm meýdança boldy. Şular ýaly çäreler ýaşlaryň ylmy işjeňligini höweslendirmek we ýokary okuw mekdepleriniň arasyndaky hyzmatdaşlyk gatnaşyklaryny berkitmek maksady bilen, Rumyniýanyň hyzmatdaş uniwersitetleriniň howandarlygynda her ýyl yzygiderli guralýar.
