10-njy dekabrda Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň wise-prezidenti Oguljahan Atabaýewa birnäçe duşuşyklary geçirdi.
Özbegistan Respublikasynyň Prezidentiniň Diwanynyň ýolbaşçysy Saida Mirziýoýewa, Birleşen Milletler Guramasynyň Baş sekretarynyň orunbasary, BMG-niň Ženewadaky edarasynyň Baş direktory Tatýana Walowaýa, San-Tome we Prinsipi Demokratik Respublikasynyň Milli Assambleýasynyň Başlygy Selmira du Sakramentu, Täjigistan Respublikasynyň Premýer-ministriniň orunbasary Dilrabo Mansuri Saýdullo, Eswatini Patyşalygynyň içeri işler ministri Lindiwe Dlamini, Russiýa Federasiýasynyň Saglygy goraýyş ministrliginiň N.I.Pirogow adyndaky ylmy-barlag lukmançylyk uniwersitetiniň kafedra müdiri, Plastik, rekonstruktiw we estetiki hirurglar jemgyýetiniň prezidenti Natalýa Manturowa, Katar Döwletiniň Daşary işler ministrliginiň halkara hyzmatdaşlyk boýunça döwlet ministri Marýam bint Ali Al-Misned, Hytaý Halk Respublikasynyň Ählihytaý zenanlar federasiýasynyň wise-prezidenti we Sekretariatynyň birinji agzasy Huan Sýaoweý hem-de Eýran Yslam Respublikasynyň Hökümetiniň metbugat sekretary Fatemeh Mohajerani bilen geçirilen duşuşyklar netijeliligi we işjeňligi bilen tapawutlandy.
Duşuşyklarda hyzmatdaşlygyň möhüm ugurlary kesgitlendi. Myhmanlar türkmen topragynda geçirilen halkara maslahatda dünýä ähmiýetli meselelere garalandygyny tassykladylar. Olar halkara forumyň guramaçylyk derejesiniň Türkmenistanyň möhüm ugur boýunça oňyn tejribe toplandygyny görkezýändigini nygtadylar. Munuň özi Türkmenistanyň halkara giňişlikde eýeleýän ornuny pugtalandyrýar.