20-nji awgustda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Halk Maslahatynyň hem-de Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň ýanyndaky Ýaşulular geňeşiniň nobatdaky mejlisini geçirdi. Onda geňeşiň guramaçylyk meselelerine garaldy we bu düzümiň ýerlerde alyp barýan işleri ara alnyp maslahatlaşyldy, öňde durýan wezipeler kesgitlenildi.
Türkmenistanyň Halk Maslahatynyň Diwanynyň iş dolandyryjysy R.Bazarow mejlisiň barşynda beren hasabatynda Türkmenistanyň Halk Maslahatynyň we Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň ýanyndaky Ýaşulular geňeşiniň Aşgabat şäheri boýunça agzalary, Hormatly il ýaşululary Rejepmämmet Ataýewi hem-de Orazmuhammet Hojatowy, saglyk ýagdaýy sebäpli, geňeşiň düzüminden çykarmak; Aşgabat şäheri boýunça Ýaşulular geňeşiniň düzümine Hormatly il ýaşululary Meretgeldi Gulgeldiýewi we Italmaz Saparlyýewi hödürlemek; geňeşiň Ahal welaýaty boýunça agzasy, Hormatly il ýaşulusy Şaberdi Amansaparowy, saglyk ýagdaýy sebäpli, Ýaşulular geňeşiniň düzüminden çykarmak baradaky meselelere seredilip, geňeşiň düzümine Ahal welaýaty boýunça Arkadag şäheriniň Ýaşulular geňeşiniň wekili, Hormatly il ýaşulusy Kakajan Täşliýewi hödürlemek barada karara gelnendigini aýtdy.
Milli Liderimiz Ýaşulular geňeşiniň mejlisinde gelnen netijä we çözgütlere laýyklykda, «Türkmenistanyň Halk Maslahatynyň Ýaşulular geňeşiniň düzümini tassyklamak hakynda» hem-de «Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň ýanyndaky Ýaşulular geňeşiniň düzümini tassyklamak hakynda» Kararlara gol çekdi.
Bu ýerde durmuşa geçirilen işler, Garaşsyzlyk baýramyna taýýarlyk görmek boýunça ýerlerde alnyp barylýan çäreler barada çykyş etmek üçin geňeşiň agzalaryna söz berdi.
Türkmenistanyň Halk Maslahatynyň Başlygy Gurbanguly Berdimuhamedow Ýaşulular geňeşiniň agzalary bilen birnäçe döwletli soraglara garalandygyny aýdyp, geňeşiň täze agzalaryna işlerinde üstünlikleri arzuw etdi. Şeýlelikde, Türkmenistanyň Halk Maslahatynyň mejlisini ýokary guramaçylykly geçirmek bilen bagly işlere badalga berildi.
Türkmen halkynyň Milli Lideri Türkmenistanyň Halk Maslahatynyň hem-de Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň ýanyndaky Ýaşulular geňeşiniň nobatdaky mejlisiniň jemlenendigini aýdyp, hemmelere alyp barýan işlerinde uly üstünlikleri arzuw etdi.