«Ýandeks» topary öz gözleg ulgamynyň işini «Emeli aň blenderi» tehnologiýasynyň kömegi bilen kämilleşdirdi. Bu tehnologiýa her bir gözleg soragy üçin maglumat bloklarynyň iň amatly utgaşmasyny awtomatik usulda saýlaýar. Indi gözleg netijelerinde salgylanmalar, suratlar, wideolar, howa maglumaty we aksiýalaryň bahalary ýaly 40-a çenli dürli görnüşli bloklar görkezilip bilner.
«EA-blender» ulanyjynyň soragyny seljerip, oňa degişli meseläni çözmäge — tekst terjime etmäge, bilet satyn almaga, haryt saýlamaga ýa-da belli bir temany çuňňur öwrenmäge kömek edýän iň gowy netijeleri hödürleýär.
Tehnologiýany işläp düzüjileriň sözlerine görä, bu ulgam maglumatlaryň peýdalylygyny hasaba alyp, bary-ýogy 50 millisekundyň içinde bloklaryň iň amatly toplumyny düzýär. Mysal üçin, eger ulanyjy tarapyndan «Stambula syýahat» diýlip gözleg berilse, oňa bu şäherdäki meşhur taryhy ýerleriň sanawyny, awiabiletleriň bahalaryny, myhmanhanalary we şol ýerdäki häzirki howa ýagdaýyny öz içine alýan bloklar hödürleniler.
«EA-blenderiň» işi «transformer» neýroulgamlaryna esaslanýar. Ulgamyň düzüminde bloklaryň ýerleşişini çalt saýlaýan ýeňilleşdirilen model we onuň hiline gözegçilik edip, «halypa» roluny ýerine ýetirýän has güýçli model işleýär.
