18-nji martda Aşgabat şäherinde Türkmenistanyň Söwda-senagat edarasynyň binasynda «IFT 2026» — «Türkmenistanyň geljegine maýa goýumlar» atly halkara maýa goýum forumy geçiriler.
27-nji fewralda Türkmenistanyň Prezidentiniň sanly ulgam arkaly geçiren Ministrler Kabinetiniň nobatdaky mejlisinde Türkmenistanyň Senagatçylar we telekeçiler birleşmesiniň döredilmeginiň 18 ýyllygyna bagyşlanan halkara sergini hem-de «Türkmenistanyň geljegine maýa goýumlar» atly halkara maýa goýum forumyny (IFT 2026) ýokary derejede guramak meselesi ara alnyp maslahatlaşyldy.
Ministrler Kabinetiniň Başlygynyň orunbasary taýýarlyk işleriniň alyp barlyşy barada hasabat berdi. Bellenilişi ýaly, geçiriljek çärelere daşary ýurt kompaniýalarynyň we halkara guramalarynyň 70-e golaýynyň gatnaşjakdygyny tassyklanyldy. Oňa Türkmenistan tarapyndan degişli ministrlikleriň we pudaklaýyn dolandyryş edaralarynyň wekilleriniň, şeýle hem Türkmenistanyň Senagatçylar we telekeçiler birleşmesiniň agzalarynyň gatnaşmagy göz öňünde tutulýar.
Forum anyk netijeleri gazanmaga gönükdirilýär — ylalaşyklaryň baglaşylmagy we maýa goýum başlangyçlarynyň durmuşa geçirilmegi göz öňünde tutulýar.
Esasy ugurlar:
— Hususy pudagyň ösüşi
— Döwlet-hususy hyzmatdaşlygy
— Agrar pudak we azyk howpsuzlygy
— Infrastruktura we ulag ulgamyna maýa goýumlarynyň ösüşi
— Sanly özgertmeler
Forum telekeçilere taslamalaryny tanyşdyrmaga, maýa goýumlaryny çekmäge we täze hyzmatdaşlary tapmaga şert döreder. B2B, B2G we B2C formatlary netijeli gepleşikleri üpjün eder. Halkara forum Türkmenistanyň Söwda-senagat edarasy hem-de Türkmenistanyň Senagatçylar we telekeçiler birleşmesi tarapyndan «TMT Consulting Group» bilen hyzmatdaşlykda geçirilýär.
Türkmenistanyň Senagatçylar we telekeçiler birleşmesiniň döredilmeginiň 18 ýyllygy mynasybetli geçiriljek halkara sergi, şeýle hem «Türkmenistanyň geljegine maýa goýumlar» (IFT 2026) atly halkara forum utgaşykly geçiriler. Guramaçylar hasaba alnyşyň dowam edýändigini habar berýärler.
