«Opta» statistika platformasynyň superkompýuteri 2026-njy ýylyň futbol boýunça dünýä çempionatynda ýygyndy toparlaryň ýeňiş gazanmak mümkinçilikleri baradaky soňky hasaplamalaryny hödürledi.
Emeli aňyň çaklamasyna görä, çempionlyk ugrunda iň esasy dalaşgär Ispaniýadyr — onuň ýeňiş gazanmak ähtimallygy 16% diýlip bahalandyrylýar.
Esasy üçlüge şeýle hem Fransiýanyň (12,9%) we Angliýanyň (10,8%) milli ýygyndylary girdi.
Garaşylýan bu mundial özüniň gerimi boýunça üýtgeşik bolar we absolýut rekord goýar — tomaşaçylara jemi 104 oýun garaşýar. Taryhda ilkinji gezek final tapgyrynda 48 ýygyndy topar çykyş eder. Olar her birinde 4 ýygyndy bolan 12 toparça bölünerler.
Üç ýygyndy topar — ABŞ, Kanada we Meksika — guramaçy döwletler hökmünde saýlama tapgyryndan boşadyldy we ýaryşa awtomatik usulda gatnaşmaga hukuk gazandy. Galan 45 gatnaşyjy bolsa saýlama tapgyrlarynyň «eleginden» geçip, ýaryşa gatnaşmaga mümkinçilik aldy.
Ýaryşyň toparlaýyn tapgyry nusgawy aýlaw formatynda geçiriler (her topar üç oýun oýnar) we 11—27-nji iýun aralygynda dowam eder.
Pleý-off tapgyrynda her dörtlükden (kwartetden) iň güýçli iki topar, şeýle hem öz toparçalarynda üçünji orny eýelänleriň arasyndan iň gowy netije görkezen 8 ýygyndy göreşi dowam eder.
