5-nji we 6-njy sentýabrda «Bilelik Hub» döredijilik merkezinde häzirki zaman sungatyny, bilimi, biznesi, tehnologiýalary we döredijilik başlangyçlaryny bir meýdançada jemlejek «ARTVERSE - Art • Ideas • Business • Innovation» festiwaly geçiriler.
Iki günüň dowamynda festiwala gelýänlere sergiler, kitap ýarmarkasy, ussatlyk sapaklary, kinofilmleriň görkezilişi, bilim we biznes sessiýalary bilen baýlaşdyrylan giň maksatnama garaşýar. Türkmenistanyň meşhur suratkeşleriniň eserleriniň sergisi festiwalyň esasy wakalarynyň biri bolar. Ekspozisiýada Türkmenistanyň halk suratkeşleri Juma Amandurdynyň, Hoja Çüriýewiň we Möjek Çaryýewiň, şeýle hem zehinli ussatlar Serdar Çerkezowyň, Durdy Pirowyň, Toýly Çopanowyň, Şageldi Orazlyýewiň, Maral Hojagulyýewanyň işleri we «Primavera Art Lover» galereýasynyň eserleri hödürlener. Sergilenýän suratlary satyn almak hem mümkin bolar.
«ARTVERSE» festiwalynyň myhmanlary «Readit», «MagicBook», «Passenger Book» we «Arsbooka» dükanlarynyň gatnaşmagyndaky kitap ýarmarkasyna hem baryp bilerler. «NurArt» zolagynda bolsa küýzegärlik sungaty, palçykdan ýasamak, şoperleri (mata torbalary) bezemek we dürli art-obýektleri döretmek boýunça döredijilik sapaklaryna gatnaşmak mümkinçiligine eýe bolarlar. Şeýle hem çärede art-market hereket eder we çagalar toparynyň gatnaşmagynda aktýorlyk çykyşy bolar.
Bilim, tehnologiýalar we biznes. Birinji günüň işewürlik we bilim bölüminiň çäklerinde Beýik Britaniýada bilim almak mümkinçiliklerine bagyşlanan «Chevening Alumni Panel» atly çäre geçiriler. Onda maksatnamanyň dürli ýyllardaky uçurumlary öz tejribelerini paýlaşarlar we sowallara jogap bererler. Şeýle hem gatnaşyjylar döwrebap tehnologiýalar barada has köp maglumat alyp, hünärmenlerden 3D-şekillendiriş we professional emeli aň (AI) animasiýasy boýunça ussatlyk sapaklaryna gatnaşyp bilerler. Biznes temasyna hem aýratyn üns berler.
Festiwalyň çäklerinde «Bilelik Hub × ÇELGI» hyzmatdaşlygynyň täze modeli bolan «Ýol ugra ylalaşarys» (Договоримся по ходу) atly biznes-keýs, şeýle hem telekeçiler we startapçylar üçin hakyky tejribeleri seljerýän amaly biznes-sessiýasy geçiriler. Ikinji gün bilim maksatnamasy ýagly we akril boýaglar bilen surat çekmek, floristika hem-de arhitektura boýunça ussatlyk sapaklary bilen dowam eder. Şeýle hem «ShakhtiSAT» global maksatnamasynyň finalçysy tarapyndan hemra ulgamlaryna we kosmos tehnologiýalaryna bagyşlanan aýratyn maglumat sessiýasy guralar.
Sungat — ekranda we janly görnüşde. Festiwalyň maksatnamasyna ýörite kino görkezilişleri hem girizildi. 5-nji sentýabrda tomaşaçylar ýagly boýaglar bilen çekilen üýtgeşik animasiýa usulyndaky «Wan Gog. Söýgi bilen, Winsent» atly çeper filmi görüp bilerler. 6-njy sentýabrda bolsa Tim Bertonyň suratkeş Margaret Kiniň durmuşyndan söz açýan «Uly gözler» (2014) filmi görkeziler. Festiwal 6-njy sentýabrda dabaraly ýapylyş we täsin bäsleşigiň ýeňijisini sylaglamak bilen tamamlanar. Gatnaşyjylara meşhur bir suratyň gahrymanynyň keşbinde (realistik penjekde) gelmek teklip edilýär. Baş baýrak — sergiden hakyky surat bolar.
«ARTVERSE» 5-nji we 6-njy sentýabrda sagat 11:00-dan 22:00-a çenli dowam eder.
Giriş biletleriniň bahasy:
100 TMT — uly adamlar üçin;
50 TMT — çagalar üçin;
Talyplar üçin 10% arzanladyş (talyp şahadatnamasyny görkezen ýagdaýynda).
Umumy giriş bahasyna sergä, ýarmarkalara, kino görkezilişlerine we mugt maglumat sessiýalaryna gatnaşmak degişlidir. Käbir ýöriteleşdirilen ussatlyk sapaklaryna gatnaşmak üçin aýratyn tölenilýär.
Şunlukda, «ARTVERSE» sungatyň, pikirleriň, bilimiň, telekeçiligiň we innowasiýalaryň bir ýerde jemlenýän meýdançasyna öwrülip, myhmanlara diňe bir suratkeşleriň döredijiligi bilen tanyşmaga däl, eýsem, täze bilimlere, amaly tejribä we ylhama eýe bolmaga mümkinçilik berer.
Salgy: Seýdi köçesi 70/1, «Aşgabat» söwda we dynç alyş merkezi, 1-nji gat, «C» blok.
Has giňişleýin maglumat we hasaba durmak üçin: https://bilelik.com.tm/event
Tel: +99363476289
Resmi saýty: bilelik.com.tm
Elektron poçta: info@bilelik.com.tm
Instagram: @bilelik_hub
Telegram: t.me/bilelik_hub
Whatsapp: https://wa.me/99363476289
