Nýu-Ýorkda geçen «UFC 322» ýaryşynda russiýaly söweşiji Islam Mahaçew awstraliýaly Jek Della Maddaleni ýeňlişe sezewar etdi. Türgenleriň ýarym orta agramdaky (77,1 kg çenli) tutluşygy promouşeniň esasy duşuşygy boldy.
Söweş 5 raundlap dowam etdi we eminleriň biragyzdan kabul eden çözgüdi esasynda Mahaçewiň ynamly ýeňşi bilen jemlendi. Islam bütin söweşi öz elinde saklady we awtraliýaly garşydaşyna mümkinçilik bermedi.
Şeýlelikde, professional karýerasynda diňe bir gezek ýeňlişe sezewar bolan Mahaçew 28-nji ýeňşini gazandy. Ol mundan ozal ýeňil agram derejesinde çykyş edipdi we «UFC-niň» çempionlyk guşagyny dört gezek üstünlikli gorapdy.
Mahaçewiň şu tutluşygyň hatyrasyna ýeňil agramyň (70,3 kg çenli) çempionlyk guşagyndan ýüz öwrendigini bellemek gerek. Della Maddaleni ýeňmegi Islamyň iki agramda «UFC-niň» çempiony hökmünde bellige alynmagyna getirdi. Şeýlelikde, ol iki agramda çempionlyga ýeten ilkinji russiýaly türgen boldy.
