Şu gün — 28-nji ýanwarda Türkiýe Respublikasynyň Türkmenistandaky Adatdan daşary we Doly ygtyýarly ilçisiniň resmi rezidensiýasynda metbugat maslahaty geçirildi. Çäre iki ýurduň 2025-nji ýyldaky hyzmatdaşlygynyň netijelerine we geljekki mümkinçiliklerine bagyşlandy.
Diplomatik wekilhananyň ýolbasçysy Ahmet Demirok öz çykyşynda doganlyk döwletleriň arasyndaky gatnaşyklaryň hakyky «altyn döwrüni» başdan geçirýändigini tassyklaýan täsirli sanlary we maglumatlary mälim etdi.
Söwda dolanyşygy: maksat — 5 milliard dollara ýetirmek
Iki ýurduň ykdysady gatnaşyklary çalt depginler bilen ösýär. Ilçiniň bellemegine görä, diňe 2025-nji ýylyň 11 aýynyň dowamynda özara söwda dolanşygy 2 milliard dollara golaýlady. Emma bu diňe bir aralyk tapgyrydyr.
«Biziň ýakyn geljekdäki meýilnamamyz — söwda dolanyşygyny 5 milliard dollara ýetirmekdir» diýip, Ahmet Demirok nygtady.
Bu maksada tarap ädiljek möhüm ädimleriň biri hem 10-12-nji fewral aralygynda Aşgabatda geçiriljek Türkiýäniň eksport harytlarynyň giň gerimli sergisi bolar. Sergä Türkiýäniň öňdebaryjy 80 kompaniýasynyň we 14 sany iň baýry ýokary okuw mekdepleriniň (döwlet we hususy ulgamlarynyň) gatnaşmagyna garaşylýar. Bu bolsa Ankaranyň diňe bir senagat däl, eýsem, bilim ulgamyndaky hyzmatdaşlyga hem uly gyzyklanma bildirýändigini görkezýär. Häzirki wagtda Türkiýäniň ýokary okuw mekdeplerinde 40 müňe golaý türkmen talybynyň bilim alýandygy aýratyn bellenildi.
Gaz üpjünçiligi
Duşuşygyň esasy temalarynyň biri-de energetika boldy. Diplomat strategik üstünlik barada durup geçdi: 2025-nji ýylyň fewralynda «BOTAŞ» kompaniýasy bilen «Türkmengaz» döwlet konserniniň arasynda gol çekilen şertnama esasynda, Eýranyň üsti bilen gaz ibermek ulgamy işe girizildi.
Eýýäm geçen ýylyň 1-nji martyndan başlap, Türkmenistandan Türkiýä ýylda 2 milliard kub metre çenli tebigy gaz ugradylyp başlandy. Bu taslama Türkmenistan üçin täze eksport mümkinçiliklerini açdy.
Gurluşyk taslamalary
Garaşsyzlygyny alan gününden bäri türk potratçylary Türkmenistanda 1000-den gowrak taslamany amala aşyrdylar.
Infrastruktura gönükdirilen maýa goýumlaryň umumy mukdary takmynan 54 milliard dollara deň boldy. Halkara port, elektrik stansiýalary, döwrebap awtobanlar, köpugurly hassahanalar, uniwersitetler we ýaşaýyş jaýlary — bu desgalaryň her biriniň gözbaşynda ygtybarly hyzmatdaşlyk ýatyr.
Syýahatçylyk
Iki halkyň gatnaşyklarynyň özeninde umumy kökler: dil, din, medeniýet we taryh ýatyr.
Ynsanperwer baglanyşyklar statistik maglumatlar bilen hem tassyklanýar. Ilçiniň bellemegine görä, 2025-nji ýylda Türkmenistanyň raýatlarynyň 200 müňe golaýy Türkiýä syýahat etdi. Syýahatçylyk her gün müňlerçe adamy ýakynlaşdyrýan «köpri» bolmagynda galýar.
Şeýle hem 2026-njy ýylyň aprel aýynda Aşgabatda Ykdysady hyzmatdaşlyk boýunça Hökümetara türkmen-türk toparynyň 9-njy mejlisini geçirmegiň meýilleşdirilýändigi mälim edildi. Çäre Türkiýäniň wise-prezidenti Jewdet Ýylmazyň we Türkmenistanyň Ministrler Kabinetiniň Başlygynyň orunbasary Nökerguly Atagulyýewiň başlyklyk etmeginde geçiriler.
Diplomatyň sözlerine görä, gün tertibinde duran we geljegi uly bolan bilelikdäki taslamalar, ykdysady hyzmatdaşlygy berkitmek we täze maýa goýum ugurlaryny gözlemek meseleleri ara alnyp maslahatlaşylar.
Metbugat maslahatynyň dowamynda Türkiýäniň ilçisi möhüm taryhy maglumata hem ünsi çekdi: Türkiýe Türkmenistanyň Garaşsyzlygyny ilkinji bolup ykrar eden döwletdir. Onýyllyklaryň geçendigine garamazdan, Ankara Aşgabadyň ynamdar hyzmatdaşy bolmagynda galýar, ýurduň hemişelik Bitaraplyk hukuk derejesini doly goldaýar we iri milli maksatnamalaryň durmuşa geçirilmegine işjeň gatnaşýar.
