24-26-njy noýabr aralygynda Aşgabatda, Türkmenistanyň Söwda-senagat edarasynda 5-nji halkara logistika forumy we sergisi — «ITTC 2026»: «Halkara ulag-tranzit geçelgeleri: özara baglanyşyk we ösüş» geçiriler.
Forum we sergi «OGUZ Forum & Expo» düzümine girýän «Talwas ýoly» ýapyk görnüşli paýdarlar jemgyýeti tarapyndan şu aşakdaky guramalaryň gatnaşmagynda guralýar: «Türkmenawtoulaglary» agentligi, «Türkmendemirýollary» agentligi, «Türkmenhowaýollary» agentligi, «Türkmendenizderýaýollary» agentligi, Türkmenistanyň Ulag-logistika merkezi (TULM) we Türkmenistanyň Söwda-senagat edarasy.
«ITTC 2026» ulag-tranzit geçelgelerini ösdürmek, logistika düzümini kämilleşdirmek, multimodal daşamalar we ulag pudagyny sanlylaşdyrmak meselelerini ara alyp maslahatlaşmak üçin halkara meýdança bolar. Forum döwlet edaralarynyň, halkara guramalarynyň, telekeçilik düzümleriniň wekillerini, maýadarlary, logistika operatorlaryny we tehnologik çözgütleri üpjün edijileri bir ýere jemlär.
Işewürlik maksatnamasynyň esasy üns merkezinde — Orta geçelgäni (Middle Corridor) we Hazar deňzi arkaly geçýän ugurlary ösdürmek, sanly logistika, ulag düzümindäki maýa goýum mümkinçilikleri, awiasiýa ýük daşamalary we durnukly ulag çözgütleri bolar.
Deslapky çaklamalara görä, «ITTC 2026»-a 25-den gowrak ýurtdan 500-den gowrak wekil, 1000-den gowrak hünärmen-myhman we 100-den gowrak kompaniýa gatnaşar. Forumyň çäginde B2B we B2G görnüşindäki işewür duşuşyklar hem meýilleşdirilýär.
«ITTC 2026» sergisi gatnaşyjylara ulag we logistika ulgamyndaky innowasion çözgütlerini hödürlemäge, täze hyzmatdaşlyk gatnaşyklaryny ýola goýmaga we halkara hyzmatdaşlygyň geljegini ara alyp maslahatlaşmaga mümkinçilik berer.
Bu forumyň Aşgabatda geçirilmegi Türkmenistanyň Ýewropa bilen Aziýanyň arasyndaky möhüm ulag-logistika halkasy hökmündäki strategik ähmiýetini ýene-de bir gezek tassyklaýar.
Çäre baradaky goşmaça maglumatlar ittc-tm.com saýtynda elýeterlidir.
