Aktauda badalga alan WKF karate boýunça Merkezi Aziýanyň 11-nji çempionatynyň ilkinji gününde Türkmenistanyň türgenleri dört medala — bir altyn, bir kümüş we iki bürünç medala mynasyp boldular.
Üç gün dowam etjek ýaryşlar alty ýurtdan — Eýrandan, Gazagystandan, Gyrgyzystandan, Täjigistandan, Türkmenistandan we Özbegistandan 500-e golaý türgeni bir ýere jemledi. Olar kadetleriň, ýetginjekleriň we uly ýaşlyaryň arasynda kata (gönükmeleriň görkezme çykyşy) hem-de kumite (ýekelikdäki söweş) ugurlary boýunça medallar ugrunda bäsleşýärler.
Türkmenistanyň Karatedo federasiýasynyň habar bermegine görä, ýurdumyzyň ýygyndy toparyna 36 türgen, 4 tälimçi, 6 emin we 1 wekil agzalyk edýär.
Çempionatyň birinji gününde watandaşlarymyz kata ugry boýunça medallary eýelediler.
14 ýaşly ýetginjekleriň arasynda Mary welaýatynyň Baýramaly şäherindäki 18-nji orta mekdebiň 7-nji synp okuwçysy Muhammetresul Haýrullaýew iň ýokary derejeli baýraga (altyn medala) mynasyp boldy.
16-17 ýaşly ýetginjekleriň (ýuniorlaryň) arasynda geçirilen bäsleşikde ýöriteleşdirilen 52-nji orta mekdebiň 11-nji synp okuwçysy Allanur Ýalkabow kümüş medal gazandy.
Iň kiçi ýaş derejesi bolan 10-11 ýaşlylaryň arasynda Mary welaýatynyň Baýramaly şäherindäki 6-njy orta mekdebiň 5-nji synp okuwçysy Musa Gurbanow we Baýramaly şäherindäki 11-nji orta mekdebiň 4-nji synp okuwçysy Şirmuhammet Garymyradow bürünç medalçylar boldular.
Ýaryşlar dowam edýär.
