Aktau şäherinde geçirilýän WKF karate boýunça Merkezi Aziýa çempionatynyň ikinji gününde Türkmenistanyň türgenleri ýene-de 9 medala — iki altyn, üç kümüş we dört bürünç medala mynasyp boldular. Olaryň ählisi kadetleriň arasyndaky kumite (tutluşyklar) bäsleşiklerinde gazanyldy.
Iň ýokary derejeli medallary Aşgabatdaky 42-nji orta mekdebiň 9-njy synp okuwçysy Safiýa Nazarowa we Mary welaýatynyň Baýramaly şäherindäki 4-nji orta mekdebiň 7-nji synp okuwçysy Leýli Hommatmyradowa eýelediler. Olaryň birinjisi 12-13 ýaşly gyzlaryň arasynda 47 kg çenli agram derejesinde, ikinjisi bolsa iň kiçi ýaş tapgyrynda (10-11 ýaş) 36 kg agramda altyn medal gazandy.
10-11 ýaşly türgenleriň arasynda 45 kg-den ýokary agram derejesinde Aşgabatdaky 27-nji orta mekdebiň 7-nji synp okuwçysy Emir Gurbanow kümüş medalçy boldy. Şol kiçi ýaş tapgyrynda Mary welaýatynyň Türkmengala etrabyndaky 33-nji orta mekdebiň 5-nji synp okuwçysy Gülaýym Döwletowa (32 kg çenli) we Ahal welaýatynyň Ak bugdaý etrabyndaky 46-njy orta mekdebiň 5-nji synp okuwçysy Babageldi Myradow (40 kg çenli) ýene iki kümüş medaly eýeledi.
Bürünç medallara bolsa şu türgenler mynasyp boldular: 10-11 ýaşly türgenleriň arasynda 40 kg çenli agram derejesinde çykyş eden Ahal welaýatynyň Ak bugdaý etrabyndaky 1-nji orta mekdebiň 5-nji synp okuwçysy Şamuhammet Hojaýew; 12-13 ýaş tapgyrynda bolsa Aşgabatdaky 106-njy orta mekdebiniň 7-nji synp okuwçysy Kasym Hallyýew (40 kg çenli), paýtagtymyzdaky 19-njy orta mekdebiň 9-njy synp okuwçysy Muhammetaly Atdaýew (50 kg çenli) we Mary welaýatynyň Baýramaly şäherindäki 1-nji orta mekdebiň 7-nji synp okuwçysy Anara Baratowa (47 kg çenli).
Ýaryşyň birinji gününde türkmen karateçileri kata (gönükmeleri görkezmek) görnüşi boýunça 4 medala — bir altyn, bir kümüş we iki bürünç medallara eýe bolupdylar.
WKF karate boýunça Merkezi Aziýanyň 11-nji çempionatyna Eýrandan, Gazagystandan, Gyrgyzystandan, Täjigistandan, Türkmenistandan we Özbegistandan 500-e golaý türgen gatnaşýar. Olar kadetleriň, ýetginjekleriň we uly ýaşlyaryň arasynda kata hem-de kumite görnüşleri boýunça medallar ugrunda bäsleşýärler.
Türkmen karateçileri bu ýaryşlarda milli ýygyndynyň baş tälimçisi Aýdyň Çaryýewiň, onuň kömekçisi Esenbaý Ýazmedowyň hem-de milli tälimçiler Maksat Atdaýewiň we Serdar Muhammetnazarowyň ýolbaşçylygynda çykyş edýärler.
