24-25-nji iýunda Almatyda GDA ýurtlarynyň kino ulgamynyň wekillerini birleşdirjek «Merkezi Aziýa+» kinoforumy geçiriler. Çäräni Russiýanyň Medeniýet ministrliginiň hem-de GDA gatnaşyjy döwletleriň Ynsanperwer hyzmatdaşlygynyň döwletara gaznasynyň goldamagynda «ROSKINO» guraýar.
Bu meýdança sebitde medeniýetara gepleşikleri çuňlaşdyrmagyň we bilelikdäki kino önümçiligini ösdürmegiň möhüm guralyna öwrülmelidir.
Öňdebaryjy milli studiýalaryň wekilleriniň gatnaşmagyndaky sessiýalary öz içine alýan forumyň işewürlik maksatnamasy «Dostluk öýünde» guralar. Gazagystandan, Gyrgyzystandan, Russiýadan, Täjigistandan, Türkmenistandan we Özbegistandan gatnaşjak wekiller hyzmatdaşlygyň geljegini, tejribe alyşmagy we umumy döredijilik başlangyçlaryny durmuşa geçirmegi ara alyp maslahatlaşarlar.
Şol bir wagtda «Arman» kinoteatrynda gatnaşyjy döwletleriň dürli žanrlardaky filmleriniň görkezişleri guralar, olar Arkalaşygyň ýurtlarynyň baý medeni mirasyny görkezerler.
Guramaçylaryň bellemegine görä, forum hünär jemgyýetçiliginiň netijeli gepleşiklerini ýola goýmak üçin özboluşly meýdança bolar. Çäre diňe bir milli kino ulgamyny ösdürmäge däl, eýsem, kinematografiýa arkaly umumy gymmatlyklary giňden ýaýmaga hem gönükdirilendir.
Duşuşyk GDA ýurtlarynyň arasyndaky ynsanperwer gatnaşyklary berkitmäge ýardam etjek täzе bilelikdäki taslamalary döretmek üçin itergi bolar.
