«Toyota» kompaniýasynyň eýeçiligindäki «Lexus» premium markasy özüniň baýdagy hökmünde çykyş edýän «LS» sedan modelini ilkinji gezek 1989-njy ýylda hödürläpdi. Şondan bäri dört gapyly modeliniň birnäçe nesli çalşypdyr. «LS-iň» häzirki wagtda satylýan bäşinji nesli 2017-nji ýylyň başynda bazarda peýda bolupdy, 2020-nji ýylyň ortalarynda bolsa düýpli restaýlingi başdan geçirdi. Indi bolsa kompaniýa 2026-njy ýylyň modeli hökmünde «LS-iň» ýerli bazar üçin nähili täzelikleri alandygyny habar berdi. Täzelenmeleriň sanawy diýseň ýönekeý.
Model üçin täze reňkler gözden geçirildi — indi onuň reňkleriniň hataryna iki täze äheň goşuldy: ak «Nova Glass Flake» we çuň gök «Deep Blue Mica». Mundan başga-da, «Lexus LS-iň» goşmaça töleg esasynda hödürlenýän «F Sport» toplumyndaky saklaýyş enjamy indi gyzyl reňkde bolup, üstünde kümüşsöw marka nyşany we «Lexus» ýazgysy ýerleşdirilýär.
Interýeriň bezegi, şeýle-de eksterýer üýtgewsiz galýar. Öň panelde öňküsi ýaly 12,3 dýuýmlyk sanly gurallar paneli we sensorly maglumat ulgamynyň ekrany ýerleşýär. Täzelenmeleriň sanawyna ähli nusgalarda ýerleşdiriljek standart görnüşde girizilen öň we arka oturgyçlaryň gyzdyrylyş ulgamy hem girer.
Ýerli bazar üçin niýetlenen «Lexus LS 2026» modeli tehniki taýdan üýtgemez. «LS 500» modeli 3,5 litrlik «V35A-FTS» seriýaly V6 biturbo benzin hereketlendiriji bilen enjamlaşdyrylandyr, onuň iň ýokary kuwwaty — 420 at güýji. Bu hereketlendiriji 10 basgançakly awtomat geçiriş gutusy bilen utgaşyklylykda işleýär. Ulgam yzky tigirleri işleýän ýa-da doly hereketlenmek mümkinçiligi bilen üpjün edilýär.
«Lexus LS 500h» bolsa öňküsi ýaly gibrid güýç ulgamyna eýedir. Ol 3,5 litrlik «8GR-FXS» seriýaly V6 hereketlendirijisine esaslanýar we iki elektrik hereketlendirijisi bilen utgaşýar. Bu ulgamyň umumy kuwwaty — 359 at güýji. Bu ýerde hem hereketlendiriş ulgamy yzky tigirleri işleýän ýa-da doly görnüşde bolup biler.
Täzelenen sedan eýýäm Ýaponiýadaky resmi wekilleriň eline gowuşdy. Benzinli «Lexus LS-iň» başlangyç modeli üçin indi azyndan 11 110 000 ien (takmynan 73 müň dollar) talap edilýär. Bu hereketlendirijili iň ýokary görnüş üçin bolsa azyndan 16 270 000 ien (takmynan 107 müň dollara golaý) tölemeli bolar. Gibrid modeliň bahasy 12 570 000-den 17 730 000 ien aralygynda (takmynan 82 450-den 116 296 dollara çenli) üýtgeýär. Täze model ýylyna geçilmegi bilen birlikde, ähli görnüşleriň bahasy 150 — 170 müň iene çenli ýokarlandy.
