10 — 12-nji oktýabr aralygynda Türkmenistanyň Söwda-senagat edarasynyň Sergi merkezinde «Saglygy goraýyş, bilim we sport Berkarar döwletiň täze eýýamynyň Galkynyşy döwründe» atly halkara sergi ýaýbaňlandyrylar.
Giň gerimli ekspozisiýa jemgyýetiň sazlaşykly ösüşiniň binýady bolup durýan döwlet syýasatynyň üç strategik ugruny hemmetaraplaýyn açyp görkezer. Bu sergi ýurdumyzyň milli saglygy goraýyş ulgamyny döwrebaplaşdyrmakda, öňdebaryjy bilim ülňülerini ornaşdyrmakda hem-de köpçülikleýin sporty we sagdyn durmuş ýörelgesini wagyz etmekde gazanan ajaýyp üstünliklerini giňden şöhlelendirmäge gönükdirilendir. Mundan başga-da, ol innowasion tehnologiýalary görkezmek, tejribe alyşmak hem-de ýurdumyzyň we daşary ýurtly hyzmatdaşlaryň arasynda özara bähbitli şertnamalary baglaşmak üçin netijeli meýdança bolup hyzmat eder.
Guramaçylyk topary ugurdaş hünärmenleri, ministrlikleriň hem-de pudaklaýyn edaralaryň bilermenlerini, Senagatçylar we telekeçiler birleşmesiniň agzalaryny, şeýle-de ýerli telekeçileri we daşary ýurt kompaniýalaryny sergä tomaşa etmäge çagyrýar.
Bu çäre dünýäniň öňdebaryjy meýilleri bilen tanyşmaga, gös-göni işewür gatnaşyklary ýola goýmaga hem-de lukmançylyk, ylym, bilim we sport ulgamlarynda bilelikdäki taslamalaryň geljekki mümkinçiliklerini ara alyp maslahatlaşmaga ajaýyp şertleri döredýär.
