Ýurdumyzyň mekdep okuwçylaryndan ybarat topar robototehnika boýunça Koreýa Respublikasynyň Inçhon şäherinde geçiriljek «FIRST Global Challenge 2026» atly halkara bäsleşigine gatnaşar. «Robotlaryň Olimpiadasy» diýlip hem atlandyrylýan bu iri bäsleşik 7 – 10-njy oktýabr aralygynda geçiriler. Oňa dünýäniň 190-dan gowrak döwletiniň ýaşlarynyň gatnaşmagyna garaşylýar.
Bu halkara bäsleşige gatnaşjak «OguzRobot» topary Aşgabat şäherindäki dil dersleri çuňlaşdyryp öwredýän ýöriteleşdirilen 97-nji orta mekdebiniň okuwçylary Nowbatow Suhan, Rejepow Oraznyýaz, Çolukow Aznawur, Babajyýew Arslan we Gurbanow Daýhan dagysyndan düzülen. Topar «Ýaş inžener 2026» bäsleşiginde tapawutlanan okuwçylardan seçilip alyndy. Olara Arkadag şäherindäki 1-nji ýöriteleşdirilen okuw-terbiýeçilik toplumynyň informatika mugallymy Myrat Sähetgulyýew we Türkmenistanyň Oguz han adyndaky Inžener-tehnologiýalar uniwersitetiniň talyby Dawut Gurbanow tälim berdiler.
«FIRST Global Challenge» – bu Olimpiýa oýunlary görnüşindäki robot tehnologiýasy boýunça halkara bäsleşikdir. Ol bu gezek tebigatda döreýän ýangynlara garşy göreşmekde innowasion çözgütlere («Igniting Innovation») bagyşlanýar.
