10-njy noýabrda Polşa Respublikasynyň Katowise şäherinde ýokary okuw mekdepleriň talyplarynyň arasyndaky Halkara toparlaýyn matematika bäsleşigi (International Students Team Competition in Mathematics, ISTCiM-2026) tamamlandy. Bu bäsleşige Ýagşygeldi Kakaýew adyndaky Halkara nebit we gaz uniwersitetiniň, Magtymguly adyndaky Türkmen döwlet uniwersitetiniň, Halkara ynsanperwer ylymlary we ösüş uniwersitetiniň, S.A.Nyýazow adyndaky Türkmen oba hojalyk uniwersitetiniň, Türkmen oba hojalyk institutynyň, Türkmen döwlet binagärlik-gurluşyk institutynyň, Türkmenistanyň Döwlet energetika institutynyň, Türkmen döwlet ykdysadyýet we dolandyryş institutynyň, Türkmenistanyň Telekommunikasiýalar we informatika institutynyň talyplaryndan düzülen toparlar gatnaşdylar.
Ýagşygeldi Kakaýew adyndaky Halkara nebit we gaz uniwersitetiniň talyplary şahsy hasapda geçirilen bäsleşikde üstünlikli çykyş etdiler. Şeýlelikde, Oguzhan Garlyýew altyn medala, Halymmuhammet Annageldyýew we Halmyrat Myratgeldiýew bürünç medallara mynasyp boldular. Bu üstünlikler talyplaryň Garaşsyzlygyň 35 ýyllyk şanly baýramyna özboluşly sowgady boldy.
Katowise şäherinde geçirilen bu abraýly bäsleşige Awstriýa Respublikasynyň, Beýik Britaniýanyň we Demirgazyk Irlandiýanyň Birleşen Patyşalygynyň, Polşa Respublikasynyň, Sloweniýa Respublikasynyň, Italiýa Respublikasynyň, Ispaniýa Patyşalygynyň, Germaniýa Federatiw Respublikasynyň hem Fransiýa Respublikasynyň ýokary okuw mekdepleriniň talyplary gatnaşdylar.
Polşa Respublikasynyň Katowise şäherinde gazanylan üstünlikler ylym-bilim ulgamynda täze zehinleriň ýüze çykýandygyny, olaryň alan bilimleriniň we ukyp-başarnyklarynyň halkara derejesinde ykrar edilýändigini görkezýär.
