Türkmenistanyň küşt boýunça milli ýygyndysy Gazagystandaky okuw-türgenleşik ýygnanyşygynyň çäklerinde 3–11-nji iýun aralygynda Aktobe şäherinde geçirilen «Wladimir Dworkowiçiň ýadygärligi – Aktobe Open 2026» atly halkara küşt ýaryşyna gatnaşdy.
Ýaryş 9 tapgyrdan ybarat bolup, şweýsar ulgamy boýunça geçirildi we «Masters» we «Open» atly iki derejede ýaýbaňlandyryldy. Oňa dünýäniň 21 döwletinden 210 küştçi, şol sanda 23 grossmeýster gatnaşdy.
Ýaryşda ýurdumyzyň türgeni Mähri Agamuradowa (FIDE reýtingi – 2049) üstünlikli çykyş etdi. Ildeşimiz «Open» derejesinde 6 utuk toplap, 15-nji orny eýeledi we ýaryşyň ähli zenan gatnaşyjylarynyň arasynda iň gowy netijäni görkezdi. Üstünlikli çykyşy netijesinde ol FIDE reýtingine 83,2 ball goşup, zenanlaryň arasynda FIDE-niň ussady (WFM) derejesin kadasyna laýyk gelýän reýting görkezijisine ýetdi.
Mähri 16 ýaşynda bolup, Türkmenabat şäherindäki daşary ýurt dillerini ýöriteleşdirilip öwredýän mekdebiň 10-njy synp okuwçysydyr. Onuň küşt boýunça tälimçisi Güljahan Owlýakulyýewadyr. Türgeniň işjeňligi we oňyn garaýşy onuň oýun stilinde hem aýdyň şöhlelenýär.
Ýaryşyň netijeleri boýunça milli ýygyndynyň beýleki wekilleri hem reýtingleriniň ösüşini gazandylar:
• Ogulsuraý Baýrambaýewa (1944) – +8,2 punkt;
• Jahan Rejepowa (2057) – +26,8 punkt;
• Leýla Şöhradowa (2081) – +5,2 punkt.
FIDE reýtingi 2400 balldan ýokary bolan küştçileriň çykyş edip bilýän «Masters» derejesinde geljegi uly bolan küştçi Amanmuhammet Hommadow (FIDE reýtingi – 2385) wekilçilik etdi. Onuň garşydaşlarynyň arasynda alty grossmeýster we bir halkara ussady bardy.
Ýaryşyň netijesinde Amanmuhammet öz reýtingini 10,6 utuk ýokarlandyrdy we halkara ussady (IM) derejesiniň kadasyny ýerine ýetirmäge has-da golaýlaşdy.
«Masters» derejesiniň ýeňijisi ABŞ-dan bolan grossmeýster Endrýu Hong (reýtingi – 2587) boldy. «Open» derejesinde bolsa Gazagystandan FIDE-niň ussady Alan Petuhow (reýtingi – 2308) birinji orny eýeledi.
Türkmenistanyň milli ýygyndysynyň taýýarlygy dowam edýär. Toparyň öňünde dünýä küşt senenamasynyň iň möhüm ýaryşlarynyň biri – sentýabr aýynda Samarkant şäherinde geçiriljek 46-njy Bütindünýä küşt olimpiadasy bar.
