Türkmenistanyň Döwlet medeniýet merkeziniň Döwlet muzeýinde türkmen milli eşikleriniň sergisi açyldy. Onuň baş maksady mizeýe gelýänleri halkymyzyň gaýtalanmajak gymmatlyklary — gadymy donlary we beýleki egin-eşikleri bilen tanyşdyrmakdan ybaratdyr. Bu ýerde erkekler, zenanlar hem çagalar üçin niýetlenen donlar hödürlenip, olar XIX asyryň başlaryna hem-de XX asyryň ahyrlaryna degişlidir. Bu gymmatlyklaryň ýurdumyzyň dürli sebitlerine mahsusdygyny bellemek gerek.
Bu ýere gelýänler zenan donlaryndan, el işleriniň miwesi bolan bezeglerden, ajaýyp matalardan tikilen çabytlardan, nagyşlanan işlerden, kümüş şaý-seplerden hem-de beýleki täsin gymmatlyklardan lezzet alyp bilerler. Mahmaldan we beýleki dokma önümlerinden taýýarlanan ýyly eşikler, pagta ýüplüginden we ýüpekden tikilen önümler bezegi bilen göreni haýrana goýýar. Mundan başga-da, erkekleriň gyrmyzy donlary, ýarym ýüpek hywa eşikleri, goýun we düýe ýüňünden öndürilen önümler sergide görkezilýär.
Döwlet muzeýinde ata-babalarymyzdan miras galan milli eşikleri düýpli öwrenmek üçin diýseň ajaýyp mümkinçilik döredildi. XIX asyryň başlaryna hem-de XX asyryň ahyrlaryna degişli bolan donlar etnograflarda, taryhçylarda hem-de dizaýnerlerde uly gyzyklanma döretdi.
