BMG-niň Aşgabatdaky binasynda Türkmenistanda «Bitewi saglyk» çemeleşmesini durmuşa geçirmek boýunça Milli pudagara utgaşdyryjy toparyň bäşinji mejlisi geçirildi. Mejlisi BSGG-niň Türkmenistandaky ýurt boýunça edarasy «Merkezi Aziýada «Bitewi saglyk» başlangyjynyň çäklerinde pandemiýalaryň öňüni almak, taýýarlyk görmek we olara garşy çäre göreşmek» taslamasynyň çäklerinde gurady.
Şeýlelikde, ministrlikleriň we pudaklaýyn edaralaryň, şeýle hem BMG-niň Azyk we oba hojalygy guramasynyň (FAO), Merkezi Aziýanyň Sebit ekologiýa merkeziniň (SASEM) wekilleri «Bitewi saglyk» çemeleşmesini durmuşa geçirmegiň barşyna göz aýlamak we 2026-njy ýylyň ikinji ýarymy üçin ileri tutulýan ugurlary utgaşdyrmak maksady bilen ýygnandylar.
Mejlisiniň esasy maksatlary 2026-njy ýylyň birinji ýarymynda Türkmenistanda taslamany durmuşa geçirmekde gazanylan ösüşleri seljermek, şeýle hem milli mümkinçilikleri has-da berkitmek we meýilleşdirilen çäreleriň netijeli ýerine ýetirilmegini üpjün etmek üçin ýylyň ikinji ýarymyna niýetlenen ileri tutulýan ädimleri ara alyp maslahatlaşmak hem-de meýilleşdirmek boldy.
Duşuşygyň dowamynda gatnaşyjylar «Bitewi saglyk» çemeleşmesini we degişli taslamany durmuşa geçirmekdäki ösüşleri öwrendiler. Gazanylan netijelere, alnan tejribelere we pandemiýalaryň öňüni almakda, oňa taýýarlyk görmekde milli tagallalary goldamak üçin köppudaklaýyn utgaşyklylygy hem-de hyzmatdaşlygy has-da berkitmek mümkinçiliklerine, şol sanda ilatyň, aýratyn-da çagalaryň arasynda zoonoz ýokançlarynyň öňüni almak baradaky habarlylygyny ýokarlandyrmaga aýratyn üns berildi. Taslamanyň wagtynda we netijeli durmuşa geçirilmegini üpjün etmegiň mehanizmleri hem ara alnyp maslahatlaşyldy. Şunuň esasynda, gatnaşyjylar işleriň ileri tutulýan ugurlaryny kesgitlediler we 2026-njy ýylyň ikinji ýarymy üçin utgaşdyrylan iş meýilnamasyny ylalaşdylar.
Duşuşyga Türkmenistanyň Daşary işler ministrliginiň, Türkmenistanyň Maliýe we ykdysadyýet ministrliginiň, Türkmenistanyň Saglygy goraýyş we derman senagaty ministrliginiň, Türkmenistanyň Oba hojalyk ministrliginiň, Türkmenistanyň Daşky gurşawy goramak ministrliginiň, şeýle hem beýleki degişli milli ministrlikleriň we pudaklaýyn edaralaryň wekilleri gatnaşdylar.
Milli pudagara utgaşdyryjy topar adamyň, haýwanlaryň saglygy we daşky gurşawyň ýagdaýy üçin jogapkärçilik çekýän pudaklaryň arasyndaky hyzmatdaşlygy berkitmek üçin esasy meýdança bolup hyzmat edýär. Topar utgaşdyrylan meýilleşdirişe, maglumat alyşmaga we bilelikde karar kabul etmäge ýardam bermek arkaly «Bitewi saglyk» çemeleşmesiniň netijeli durmuşa geçirilmegini goldaýar we Türkmenistanyň epidemiýa hem-de pandemiýa ähtimallygy bolan jemgyýetçilik saglygyna abanýan howplaryň öňüni almak, olara taýýarlyk görmek we çäre görmek mümkinçilikleriniň berkemegine ýardam berýär.
Duşuşyk Türkmenistanyň Hökümetiniň, BSGG-niň, FAO-nyň we milli hyzmatdaşlaryň saglygy goraýyş ulgamyndaky toplumlaýyn meseleleri çözmek hem-de saglygy goraýyş babatda milli we sebit howpsuzlygyny berkitmek üçin esasy binýat hökmünde «Bitewi saglyk» çemeleşmesini öňe sürmäge bolan ygrarlylygyny tassyklady.
