Ispaniýanyň paýtagty Madrid şäherinde sport «Oskary» hasaplanýan «Laureus World Sports Awards» baýraklarynyň gowşuryş dabarasynyň 26-njysy geçirildi. Dabaranyň dowamynda geçen ýylyň dowamynda görkezijileri bilen dünýäni haýran galdyran iň ökde türgenler we toparlar ykrar edildi.
2025-nji ýylyň «Iň gowy türgeni» diýen abraýly ada ispan tennisçisi Karlos Alkaras mynasyp boldy. Ol geçen sport möwsüminde Fransiýanyň we ABŞ-nyň açyk çempionatlarynda («Roland Garros» we «US Open») ýeňiş gazanmagy başardy, şeýle hem ýyly dünýäniň birinji reketkasy hökmünde tamamlady.
Zenanlaryň arasynda bolsa «Ýylyň iň gowy türgeni» diýlip belarus tennisçisi Arina Sabalenka ykrar edildi. 2025-nji ýylda ol ABŞ-nyň açyk çempionatynyň (US Open) ýeňijisi boldy we bütin ýyly dünýä reýtinginiň iň ýokary basgançagynda geçirdi. Şeýle hem Sabalenka Maýami we Madrid şäherlerinde geçirilen «WTA 1000» ýaryşlarynda hem çempionlygy eýeledi.
«Ýylyň topary» diýen ugurda «PSŽ» futbol kluby ýeňiji boldy. Bu topar 2025-nji ýylda jemi alty kubogy eýelemegi başardy. Olaryň iň uly we taryhy üstünligi bolsa UEFA Çempionlar ligasyndaky ilkinji ýeňşi boldy.
«Ýylyň açylyşy» baýragy «Formula-1» ýaryşlarynyň çempiony, britaniýaly sürüji Lando Norrisa gowşuryldy. Ol Lýuis Hemiltondan (2008) we Jenson Battondan (2010) soň bu abraýly baýraga mynasyp bolan üçünji britan sürüjisi hökmünde taryha girdi.
Şu ýyl «Laureus» baýragy ilkinji gezek täze ugur — «Ýylyň iň gowy ýaş türgeni» diýen derejäni girizdi. Bu baýragyň taryhdaky ilkinji eýesi «Barselona» klubynyň we Ispaniýanyň milli ýygyndysynyň ýyldyzy Lamin Ýamal boldy.
«Laureus World Sports Awards» baýragy 1999-njy ýylda «Laureus Sport for Good» gaznasy tarapyndan esaslandyryldy. Dalaşgärleri dünýäniň öňdebaryjy habar beriş serişdeleri saýlaýarlar, ýeňijileri bolsa «Laureus World Sports» akademiýasynyň 69 sany agzasy gizlin ses bermek arkaly kesgitleýär.
