27-28-nji iýulda Özbegistanyň Gurluşyk harytlary senagaty kärhanalarynyň birleşiginiň Aşgabada işewürlik sapary guraldy. Maksatnamanyň esasy wakasy Türkmenistanyň Söwda-senagat palatasynda geçirilen Türkmen-özbek işewürlik maslahaty bolup, ol iki ýurduň degişli edaralarynyň, gurluşyk we önümçilik kärhanalarynyň wekillerini bir ýere jemledi.
Senagat we raýat gurluşygy, awtomobil ýollaryny enjamlaşdyrmak we gurluşyk harytlarynyň önümçiligi pudaklarynda işleýän 30-a golaý özbek kompaniýasyndan ybarat wekiliýet hyzmatdaşlygyň anyk ugurlaryny — harytlaryň göni iberilmeginden başlap, bilelikdäki ýokary tehnologiýaly önümçilikleriň ýola goýulmagyna çenli meseleleri ara alyp maslahatlaşmak üçin Aşgabada geldi.
Özbegistanly öndürijiler özleriniň tehnologik çözgütlerini tanyşdyrdylar: «Original Colormix» kompaniýasy sebitiň howa şertlerine uýgunlaşdyrylan boýag serişdeleriniň we gury gurluşyk garyndylarynyň görnüşlerini hödürledi; «Pipe Metal» jogapkärçiligi çäkli jemgyýeti senagat gurluşygy we jemgyýetçilik hojalygy düzümi üçin polat we metal önümlerini ibermegi teklip etdi; «Mexmash» kärhanasynyň ýolbaşçylary türkmen kärdeşlerini çylşyrymly inženerçilik desgalary üçin niýetlenen ýokary berklikdäki berkidiş serişdeleri bilen tanyşdyrdylar. Bu tanyşdyryşlar taraplaryň doly derejeli önümçilik hyzmatdaşlygyny ýola goýmaga bolan ymtylmasyny tassyklady.
B2B we B2G formatyndaky ikitaraplaýyn gepleşikler adaty eksport-import çäklerinden çykýan bilelikdäki taslamalaryň geljegini kesgitledi. Özbek gurluşykçylary Türkmenistanyň sebitde ilkinji «akylly» şäher bolan Arkadagy gurmakdaky tejribesine, şeýle hem onuň gurluşygynda ulanylan sanly konsepsiýalara aýratyn gyzyklanma bildirdiler.
Saparyň ikinji güni (28-nji iýul) obýektlerdäki amaly işlere bagyşlandy. Özbek kärhanalarynyň wekilleri Aşgabadyň iri düzümleýin meýdançalaryna aýlanyp gördüler we türkmen hyzmatdaşlary bilen göni gepleşikleri geçirdiler.
Geçirilen bu işewürlik sapary Türkmenistanyň we Özbegistanyň gurluşyk bazarlarynyň adaty söwdadan çuňňur senagat integrasiýasyna geçýändigini görkezdi. Halkara bäsdeşligiň ýokary şertlerinde tehnologik, çig mal we hünärmen serişdeleriniň birleşdirilmegi, täze eksport bazarlaryna çykmak üçin ýokary goşulan bahaly, kämil tehnologiýaly, ekologiýa taýdan arassa we energiýa tygşytlaýjy önümleri döretmäge mümkinçilik berer.
